Uji nga rrjeti i ujësjellësit të qytetit në Gostivar ende nuk është i sigurt për pije dhe mund të përdoret vetëm për nevoja teknike, njoftoi drejtuesi i Shtabit Kryesor për Menaxhimin me Krizat, Stojançe Angelov.
Edhe pse analizat e fundit laboratorike tregojnë përmirësim të ndjeshëm të cilësisë së ujit, për heqjen zyrtare të ndalesës për përdorim për pije dhe gatim nevojiten analiza shtesë. Për të konfirmuar se në ujë nuk ka më prani të baktereve të dëmshme, duhet të sigurohen tri analiza të njëpasnjëshme negative.
LSDM kërkon përgjegjësi dhe sqaron deklaratat për ujin
Lidhur me situatën ka reaguar edhe opozita. Lidhja Socialdemokrate e Maqedonisë (LSDM) ka kërkuar përgjegjësi dhe ka kritikuar deklaratat e ndryshme të zyrtarëve për cilësinë e ujit në Gostivar.
Nga partia opozitare kanë ngritur pyetje lidhur me deklaratat e mëparshme për gjendjen e ujit dhe me informacionet e reja për praninë e baktereve dhe viruseve.
Hetim për ndotjen e sistemit të ujësjellësit
Për rastin është hapur edhe procedurë hetimore. Prokuroria Themelore Publike në Gostivar më 20 korrik ka nisur hetim për vepra të rënda kundër mjedisit dhe natyrës, lidhur me ndotjen e sistemit të ujësjellësit.
Në kuadër të hetimit, gjykata ka caktuar masën e paraburgimit prej 30 ditësh për tre persona:
- ushtruesen e detyrës së drejtoreshës së NP „Komunalec“ – Gostivar, Artana Asani;
- udhëheqësin teknik të Sektorit për Punë Teknike;
- udhëheqësin e Departamentit për Ujësjellës, Kanalizim dhe Punë Ndërtimore.
Ndërkohë, ndalesa për përdorimin e ujit për pije dhe gatim mbetet në fuqi deri në marrjen e rezultateve të nevojshme laboratorike.
