Më 8 gusht shënohen 25 vjet nga ngjarja në Karapllak, ku dhjetë pjesëtarë të forcave maqedonase të sigurisë humbën jetën gjatë konfliktit të vitit 2001.
Në këtë përvjetor, kryeministri Hristijan Mickoski kujtoi të rënët dhe theksoi rëndësinë e ruajtjes së kujtimit për ta.
“25 vjet më vonë, koha nuk e ka fshirë dhimbjen dhe as nuk e ka zvogëluar respektin tonë. Përkundrazi, çdo vit na kujton se paqja, liria dhe atdheu kanë një vlerë që duhet ta ruajmë me përgjegjësi dhe dinjitet”, shkroi Mickoski në Facebook.
Ai e cilësoi Karapllakun si një plagë të përbashkët dhe bëri thirrje që emrat dhe sakrifica e të rënëve të mos harrohen.
“Para kujtimit të tyre përkulemi me mirënjohje dhe respekt të thellë. I përjetshëm qoftë kujtimi për heronjtë e Karapllakut. Lavdi e përjetshme!”, thuhet në mesazhin e Mickoskit.
Dhjetë pjesëtarët që humbën jetën ishin Sasho Kitanoski, Nane Naumoski, Branko Sekuloski, Marko Despotovski, Erdovan Shabanoski, Ljube Grujoski, Darko Vejanoski, Vebi Rushitoski, Goran Minoski dhe Pece Sekuloski.
Më 8 gusht 2001, pjesëtarët e forcave maqedonase të sigurisë u sulmuan në një pritë të ngritur nga pjesëtarë të UÇK-së gjatë konfliktit të vitit 2001.
