Gjithsej 632 shtetas nga Maqedonia kanë kërkuar informacion në lidhje me evakuimin nga disa vende në rajonin e Lindjes së Mesme, ku situata vazhdon të përkeqësohet pas sulmeve SHBA-Izrael ndaj Iranit dhe sulmeve që vijnë nga Teherani, transmeton Portalb.mk.
Siç u njoftua sot nga Ministria e Punëve të Jashtme dhe Tregtisë së Jashtme, 136 shtetas të Maqedonisë janë regjistruar në kryeqytetin e Katarit, Doha, ndërsa numri i shtetasve tanë të regjistruar në Abu Dhabi, në Emiratet e Bashkuara Arabe, është vazhdimisht në rritje dhe aktualisht është 477 persona.
Sa i përket shtetasve maqedonas në Izrael, Ministria e Punëve të Jashtme thotë se numri i personave që janë regjistruar për evakuim atje mbetet i pandryshuar. Gjysma e tyre tashmë janë evakuuar me shpenzimet e tyre me fluturime komerciale.
“Për disa prej tyre (gjithsej 6 persona), evakuimi është përfunduar me ndërmjetësimin e Ministrisë dhe ata kanë vendosur të nisen për në Shkup me shpenzimet e tyre me fluturime komerciale”, tha Ministria.
Gjashtë personat e tjerë, të cilët kanë shprehur gatishmërinë e tyre për evakuim, do të transportohen sot me rrugë tokësore nga Izraeli në Egjipt, sipas Ministrisë, me ndihmën e misioneve diplomatike dhe konsullore. Atje, ata do të akomodohen në një vend të sigurt në një hotel, me shpenzime qeveritare, ku do të presin deri nesër kur është planifikuar të fluturojnë për në Shkup me aeroplan qeveritar.
Lidhur me qytetarët e Maqedonisë në Emiratet e Bashkuara Arabe dhe Katar, Ministria e Punëve të Jashtme thotë se plani i misionit diplomatik dhe konsullor në Abu Dhabi është që ata, në koordinim me institucionet kompetente, të evakuohen me fluturime çarter.
“Misioni diplomatik dhe konsullor në Abu Dhabi, në koordinim me institucionet kompetente, është në proces të finalizimit të detajeve teknike dhe logjistike për organizimin e fluturimeve çarter. Qëllimi i Ministrisë është, në koordinim me autoritetet në Emiratet e Bashkuara Arabe dhe Katar, të sigurojë disa fluturime çarter për evakuimin e personave të regjistruar”, tha Ministria e Punëve të Jashtme dhe Tregtisë së Jashtme.
Në të njëjtën kohë, thanë ata, misionet diplomatike dhe konsullore maqedonase (MDK) po bëjnë gjithashtu një plan të veçantë për evakuimin e qytetarëve në Bahrein dhe Kuvajt.
Ministria përkatëse shtoi se mbetet në kontakt të vazhdueshëm dhe në dispozicion të plotë të qytetarëve të Maqedonisë që ndodhen në zonat e prekura nga konflikti në Lindjen e Mesme, si dhe se është në komunikim të rregullt me autoritetet lokale kompetente, me qëllim kryerjen e evakuimit në mënyrë të sigurt dhe në kohë.
Ministria e Punëve të Jashtme dhe Tregtisë së Jashtme u bën thirrje edhe një herë të gjithë qytetarëve të Maqedonisë që ndodhen në rajonet e prekura (Emiratet e Bashkuara Arabe, Katari, Bahreini dhe Kuvajti), nëse nuk e kanë bërë tashmë këtë, të kontaktojnë menjëherë misionin diplomatik dhe konsullor kompetent ose numrin SOS të Ministrisë.
Ministria e Punëve të Jashtme dhe Tregtisë së Jashtme informoi gjithaashtu se në përputhje me konkluzionin e Qeverisë, është iniciuar një procedurë prokurimi publik për organizimin e fluturimeve çarter me qëllim sigurimin e evakuimit të sigurt.
“Duke marrë parasysh urgjencën dhe faktin se situata e sigurisë aktualisht po ndryshon, procedura do të zbatohet në përputhje me Ligjin e Prokurimit Publik, me zbatimin e afateve të shkurtuara të parashikuara për situata të tilla.
Për zbatimin e këtij shërbimi janë siguruar fonde në vlerë deri në 60 milionë denarë, të parashikuara në Buxhetin e Ministrisë së Punëve të Jashtme dhe Tregtisë së Jashtme. Në varësi të numrit përfundimtar të qytetarëve të regjistruar maqedonas dhe numrit të fluturimeve çarter që do të realizohen, është e mundur që të përdoret vetëm një pjesë e shumës së planifikuar”, thonë nga MPJTJ.
Ndryshe, siç informoi Ministria e Punëve të Jashtme e Serbisë, një aeroplan i “Air Serbia” u ul mbrëmë në Beograd me 67 pasagjerë të evakuuar nga Izraeli. Ata mbërritën në Serbi nëpërmjet qytetit Sharm el-Sheikh në Egjipt, nga ku u bë edhe ngritja. Përveç qytetarëve të Serbisë, në fluturimin e evakuimit morën pjesë edhe shtetas të Maqedonisë së Veriut, Bosnjës dhe Hercegovinës, Sllovenisë, Malit të Zi dhe Kroacisë.
Ndryshe në Maqedoni u mblodh Këshilli i Sigurisë, pas çka u konstatua se situata aktualisht është e qëndrueshme dhe e sigurt.
Mëngjesin e 28 shkurtit Izraeli filloi sulmin ndaj Iranit, ndërsa më pas u bashkëngjitën edhe Shtetet e Bashkuara të Amerikës.
Sulmet nisën teksa bisedimet mes Washingtonit dhe Teheranit për programin bërthamor të Iranit kanë qenë në vazhdim nën ndërmjetësimin e Omanit, raundi i fundit i bisedimeve në përfundoi të enjten në Gjenevë.
