Nuk mund të krenohemi me sezon të mirë turistik. Ky ka qenë një nga më të dobëtit deri tani pas krizës së COVID-it, thonë punonjësit e turizmit nga rajoni i Ohrit dhe Strugës, sipas të cilëve arsyet janë të shumta: nga anulimet e operatorëve turistikë, të cilët gjatë viteve kanë sjellë turistë pranë Liqenit të Ohrit, te çmimet më të larta, konkurrenca serioze në rajon, kriza e përgjithshme ekonomike dhe luftërat.
„Kemi pasur anulime të mëdha nga operatorët turistikë që për vite me radhë operonin në aeroportin e Ohrit me fluturime çarter nga Holanda, Polonia, dhe fatkeqësisht këtë vit nuk kemi pasur mysafirë nga ata. Duke marrë parasysh statistikat dhe komunikimin e përditshëm me partnerët tanë, me hotelet dhe me pronarët e apartamenteve, mund të shihet se shumica e mysafirëve që vijnë qëndrojnë vetëm një ose dy net, thjesht për të kaluar, dhe kjo nuk mund të quhet turizëm i mirë“, tha Jakim Malenko – pronar i agjencisë turistike.
Malenko thotë se muajt më të dobët kanë qenë qershori dhe korriku.
„Patën edhe shumë pronarë apartamentesh dhe hotele që mbetën gjysmë të zbrazëta. Mendoj se Ohri meriton një ofertë turistike më të mirë, turistë më të mirë“, shtoi ai.
Ne mbetemi shumë pas në krahasim me vendet e rajonit.
„Nëse Shqipëria dhe Serbia përjetuan bum, tek ne turizmi po pëson rënie, sepse nëse i shohim rezultatet e vitit 2024 në nivel vjetor, krahasuar me vitin 2019, vitin e fundit relevant për industrinë turistike, sipas numrit të netëve të qëndrimit kemi vetëm 1% rritje. Tek Shqipëria kjo është tashmë e dukshme, ndërsa tek Serbia është midis 40–50%. Ka shumë faktorë: rritje të investimeve turistike, përmirësim të infrastrukturës, liberalizim të vizave dhe një numër i madh i linjave të reja ajrore. Pikërisht kjo na nevojitet dhe tek kjo duhet të punojmë“, u shpreh Ljupço Janevski – punonjës turistik.
Për më shumë mysafirë me buxhet më të lartë nevojitet gjithashtu reklamë më e mirë dhe oferta me forma alternative të turizmit. Një problem shtesë është se strategjia e fundit shtetërore për turizmin është nga viti 2016, ndërsa një e re ende nuk është hartuar./Alsat.mk
