Sindikata e Pavarur e Ndërmarrjes Publike “Parqe dhe Gjelbërim” – Shkup informon se vazhdon me protestat në periudhën nga ora 09:30 deri në ora 12:00, pasi të punësuarit ende nuk e kanë marrë pagën për muajin shtator. Edhe pse në takimin me drejtorin ishte premtuar se pagesa do të realizohej, paratë ende nuk janë transferuar në llogaritë e punëtorëve.
“Punëtorët nuk do të heqin dorë nga kërkesat e tyre, ndërsa sindikata mbetet e qëndrueshme në luftën për pagesë të dinjitetshme dhe trajtim të drejtë. Protestat do të vazhdojnë edhe në ditët e ardhshme, derisa të përmbushet të paktën një nga qëllimet e vendosura. Punonjësit paralajmërojnë se do t’i intensifikojnë aktivitetet nëse situata nuk zgjidhet sa më shpejt që të jetë e mundur.”, thuhet në njoftimin e tyre.
Nga sindikata thonë se kjo përbën vazhdim të serisë së vonesave dhe shpërfilljes së të drejtave themelore të punëtorëve, ndër të cilat janë edhe pagat e papaguara për muajt e mëparshëm, shpërblimet jubile, bonuset, K-15 dhe sigurimi shëndetësor.
