Kandidati i koalicionit VLEN për Komunën e Haraçinës, Daut Beqiri, ka shpërndarë një mesazh në rrjetet sociale ku u zotua se do të hapë një “kapitull të ri” për këtë komunë.
Ai theksoi se Haraçina meriton shumë më tepër nga sa ka marrë deri më tani, duke premtuar ujë të pastër në çdo shtëpi, rrugë të asfaltuara në çdo mëhallë, shkolla moderne dhe hapësira publike dinjitoze për rininë dhe familjet.
“Unë nuk ofroj iluzione, por punë të ndershme, përkushtim dhe rezultate konkrete. Haraçina nuk do të jetë më sinonim i harresës, por shembull i zhvillimit dhe krenarisë”, u shpreh Beqiri.
Në programin e tij, ai përmendi gjithashtu kanalizim modern, stadium dhe park të gjelbër, investime në arsim dhe mbulimin e plotë të “kanalit famshëm” që për vite të tëra ka qenë një plagë për banorët e Haraçinës.
Beqiri u bëri thirrje qytetarëve që me besim dhe mbështetje të përbashkët të shkruajnë kapitullin e ri të dinjitetit dhe zhvillimit për këtë komunë.
