Sot, 2 nëntor, është Dita Ndërkombëtare e dhënies fund mosndëshkimit për krimet kundër gazetarëve. Përmes fushatës “Gazetarët janë të rëndësishëm”, Këshilli i Evropës dhe pikat fokale të shteteve riafirmojnë angazhimin e tyre të përbashkët për të mbrojtur gazetarët dhe për të siguruar drejtësi për autorët e krimeve kundër tyre, transmeton Portalb.mk.
“Çdo sulm ndaj një gazetari është sulm ndaj lirisë së shprehjes dhe qasjes së njerëzve në informacion. Ai i privon qytetarët nga informacion i besueshëm, promovon dezinformimin, dobëson institucionet demokratike dhe përhap frikë midis atyre që mbrojnë të drejtën e publikut për të ditur. Prandaj, dhënia fund e mosndëshkimit për këto krime nuk ka të bëjë vetëm me mbrojtjen e gazetarëve, por edhe me mbrojtjen e vlerave të demokracisë sonë”, theksoi Muhamed Ismaili, ndihmës i ministrit për Marrëdhëniet me Publikun në Ministrinë e Punëve të Brendshme dhe pika fokale e Maqedonisë në Këshillin e Evropës për fushatën “Gazetarët janë të rëndësishëm”.
Fushata, e nisur nga Këshilli i Evropës në vitin 2023, ka ndihmuar në dy vitet e fundit për të krijuar një rrjet pikash fokale kombëtare dhe komitetesh që bashkojnë gazetarët, policinë, prokurorët dhe institucionet publike me qëllim përmirësimin e mbrojtjes dhe ndërtimin e besimit. Kjo ka kontribuar në përmirësimin e marrëdhënieve midis policisë dhe medias, si dhe në miratimin e planeve të veprimit dhe protokolleve për sigurinë e gazetarëve.
“Në Republikën e Maqedonisë, në bashkëpunim me Shoqatën e Gazetarëve të Maqedonisë, OSBE-në, Prokurorinë Themelore Publike dhe partnerë të tjerë ndërkombëtarë, janë zhvilluar dy manuale mbi sigurinë e gazetarëve dhe është krijuar një Komitet Kombëtar për Mbrojtjen e Gazetarëve për zbardhjen më të shpejtë dhe më efikase të rasteve që lidhen me gazetarët. Ministria e Brendshme ka publikuar gjithashtu Regjistrin e Sulmeve ndaj Gazetarëve në faqen e saj të internetit. Siguria e gazetarëve është një nga prioritetet kryesore për Ministrinë e Brendshme dhe është kryer punë intensive në këtë fushë vitet e fundit dhe rezultatet e një përkushtimi të tillë janë të dukshme”, thekson Ismaili.
Këshilli i Evropës dhe pikat fokale dënojnë fuqimisht të gjitha aktet e dhunës, ndalimin e paligjshëm dhe vrasjet e gazetarëve, veçanërisht në kontekstin e konfliktit të armatosur. Akte të tilla janë shkelje të rënda të së drejtës ndërkombëtare dhe një sulm ndaj vlerave themelore të gazetarisë së lirë. Të gjitha palët në konflikte thirren të respektojnë statusin e gazetarëve si jo-luftëtarë dhe të sigurojnë kushtet për punën e tyre të sigurt
themelore të gazetarisë së lirë. Të gjitha palët në konflikte thirren të respektojnë statusin e gazetarëve si jo-luftëtarë dhe të sigurojnë kushtet për punën e tyre të sigurt.
Pikat fokale u bëjnë thirrje shteteve anëtare të Këshillit të Evropës të rinovojnë detyrimet e tyre për të mbrojtur gazetarët, për të forcuar strukturat kombëtare dhe për të siguruar hetime të pavarura dhe efektive për të gjitha sulmet.
Në gjysmën e dytë të mandatit pesëvjeçar të fushatës, përparësi mbetet zvogëlimi i numrit të gazetarëve që përballen me kërcënime dhe presion, përmirësimi i mekanizmave të mbrojtjes dhe rritja e besimit midis gazetarëve, qytetarëve dhe institucioneve.
