VMRO-DPMNE mbajti tubim në komunën e Brvenicës, ku kandidati për kryetar komune Jovica Ilievski u bëri thirrje qytetarëve të votojnë për të në raundin e dytë të zgjedhjeve lokale. Në tubim mori pjesë edhe kryetari i partisë dhe kryeministri Hristijan Mickoski, i cili u bëri thirrje qytetarëve të votojnë për Ilievskin sepse, siç tha ai, ai kurrë nuk i kishte ndarë qytetarët në baza etnike apo politike.
“Mbështetja ime personale dhe mbështetja e Qeverisë është me të gjithë ata që punojnë për të ardhmen e Maqedonisë sonë të përbashkët, pavarësisht nga përkatësia etnike apo përkatësia politike. Kushdo që flet për të ardhmen e Maqedonisë është bashkëbiseduesi im i mirëseardhur. Kushdo që flet për ndarje, veçanërisht për ndarje etnike, jo vetëm që nuk është bashkëbiseduesi im i mirëseardhur, por nuk ia mendon të mirën as maqedonasit, as shqiptarit dhe as të gjitha pjesëve të tjera të popullit që janë bashkëqytetarë tanë në atdheun tonë të bukur të përbashkët të Maqedonisë. Jam i bindur se kjo do të njihet këtu në Bërvenicë dhe do të refuzohet në mënyrë masive nga banorët e komunës së Bërvenicës, sepse ata dinë të njohin cilësinë, të njohin se kush është kujdesur për 4 vitet e fundit pa bërë asnjë ndarje në komunën e Bërvenicës, as nga përkatësia etnike, as nga feja dhe as nga përkatësia politike,” tha Hristijan Mickoski, Kryeministër dhe kryetar i VMRO-DPMNE-së.
