Ministri i Punëve të Brendshme, Pançe Toshkovski, vlerëson se interpelanca e paraqitur nga grupi parlamentar i Levicës përbën, siç thekson ai, një përpjekje politike pa argumente thelbësore, që synon të pengojë procesin e luftës kundër krimit dhe korrupsionit.
Toshkovski reagoi përmes një postimi në rrjetet sociale, duke theksuar se kjo është interpelanca e tretë kundër tij brenda dy viteve dhe se, sipas tij, edhe kësaj radhe ajo është paralajmëruar përmes paraqitjeve politike dhe jo mbi bazën e argumenteve konkrete.
Ai nënvizon se interpelanca është një e drejtë demokratike e opozitës dhe se nuk ka ndërmend t’i shmanget debatit parlamentar. Përkundrazi, ai thotë se do t’i përballë qëndrimet në Kuvend para deputetëve dhe opinionit publik.
Në reagimin e tij, ministri drejtoi kritika edhe ndaj Levicës, duke pretenduar se partia me veprime të tilla po pozicionohet si aleate politike e LSDM-së dhe BDI-së, ndonëse më herët ishte paraqitur si alternativë ndaj tyre.
Toshkovski vlerëson gjithashtu se partia, sipas tij, po i drejtohet gjithnjë e më shumë konfrontimit politik dhe krijimit të krizave artificiale, në vend që të ofrojë rezultate dhe zgjidhje konkrete.
“Nuk sulmohet ai që është i parëndësishëm, por ai që ndryshon diçka”, thekson ministri, duke shtuar se do të vazhdojë të punojë dhe se gjykimin përfundimtar do ta japin qytetarët.
