Pesë persona janë plagosur nga të shtënat me armë zjarri në Universitetin Shtetëror të Virxhinias në SHBA, ndërsa njëri prej tyre ndodhet në gjendje kritike. Sipas BBC, incidenti ndodhi në orët e para të mëngjesit të së shtunës, jashtë një konvikti në kampusin universitar.
Policia u njoftua për ngjarjen rreth orës 01:28 me kohën lokale. Të pesë personat e plagosur, të cilët kishin marrë plagë nga armë zjarri, u transportuan në spitalet lokale.
Katër prej tyre kanë pësuar lëndime që nuk konsiderohen kërcënuese për jetën, ndërsa njëri ndodhet në gjendje kritike, raporton BBC.
Sipas universitetit, në ngjarje janë përfshirë disa të dyshuar. Nuk është bërë ende e ditur nëse policia ka arrestuar ndonjë prej tyre.
Një bllokim i përkohshëm i kampusit është hequr, ndërsa një prani e konsiderueshme e forcave të rendit vijon të jetë në zonë.
Hetimi po drejtohet nga Policia e Qarkut Chesterfield, në bashkëpunim me autoritetet lokale dhe policinë e kampusit.
Universiteti Shtetëror i Virxhinias ka rreth 5 mijë studentë dhe ndodhet pak më shumë se 30 kilometra në jug të Richmondit, kryeqytetit të shtetit të Virxhinias.
Sipas BBC, mësimi për semestrin e ri ishte planifikuar të niste të hënën, ndërsa konviktet e kampusit u hapën të premten për studentët që riktheheshin.
