Në Gjykatën Penale të Shkupit për sot është caktuar seancë gjyqësore për rastin e aksidenti të autobusit të “Durmo Turs” në Llaskarcë të Shkupit, i cili ka ndodhur në shkurt të vitit 2019-të dhe në të cilin kanë humbur jetën 16 persona dhe 37 të tjerë janë lënduar, njofton Portalb.mk.
Seanca duhet të vazhdojë me sqarimin e prokurorit në lidhje me ndryshimet e mundshme të akuzës, ndërkaq pritet të ketë edhe sqarime nga gjykata në lidhje me gjykatësen e dytë të lëndës, Aleksandra Risteska, e cila u zgjodh gjykatëse në Gjykatën e Apelit.
Nëse Këshilli Gjyqësor, lejon që Ristevska të gjykojë në këtë lëndë derisa të shpalljen e aktgjykimit, lënda pritet të përfundojë deri në dhjetor, por nëse me zgjedhjen e Ristevskës, ajo dërgohet në Apel dhe në këtë lëndë zëvendësohet me ndonjë gjykatës tjetër, atëherë, lënda do të fillojë nga e para.
Superekspertizat, të favorshme për “Durmon”, i pakënaqur shoferi
Në seancat e kaluara para Gjykatës janë deklaruar ekipet e ekspertëve të cilët i kanë përgatitur superekspertizat e komunikacionit dhe të makinerisë. Superekspertiza e komunikacionit, ashtu sikur superekspertiza makinerike, është përgatitur me urdhër të gjykatës, pasi ekspertizat paraprake kanë pasur kontradikta mes tyre. Avokatët e pjesëtarëve të kompanisë “Durmo Turs”, fajin ia hedhin shoferit të autobusit, ndërkaq avokati i shoferit, pretendon që fajtore është kompania, pasi që autobusi nuk ka qenë në gjendje të rregullt teknike.
Sipas dy superekspertizave, autobusi ka pasur parregullsi teknike, por këto parregullsi nuk kanë qenë shkaktar për aksidentin. Sipas tyre, shoferi edhe pse ka pasur mundësi, nuk i ka ndërmarrë veprimet e duhura për ta ndaluar autobusin, gjegjësisht nuk ka frenuar.
Prokurori konteston superekspertizat, ashtu sikur edhe familjarët e viktimave, ndërkaq përfaqësuesit e kompanisë “Durmo Turs”, i kanë hedhur këto pretendime, duke theksuar se bëhet fjalë për ekspertizë e cila nuk është porositur prej tyre, por prej gjykatës.
Aksidenti i autobusit ka ndodhur më 13 shkurt 2019, kur autobusi i “Durmo Tours” i cili lëvizte në linjën e rregullt Shkup-Gostivar doli nga autostrada afër fshatit Llaskarcë. 16 udhëtarë humbën jetën dhe 37 u plagosën. Në këtë proces gjyqësor akuzohen gjashtë persona: pronari i “Durmo Tours”, Durmish Beluli, personi përgjegjës për transport në kompani, Remzi Miftari dhe shoferi i autobusit Manoil Trifunovski, si dhe tre punonjës të stacionit të kontrollit teknik. Tre të parët akuzohen për krime të rënda kundër sigurisë së njerëzve dhe pronës në trafik, ndërsa të tjerët akuzohen për bashkëpunim në të njëjtën vepër.
“Durmo Tours” edhe sot vazhdon të punojë dhe të bartë udhëtarë.
