Nënkryetari i Kuvendit të Kosovës, Enver Hoxhaj, në një mbledhje të fundit të kryesisë, ka bërë propozimin e rëndësishëm që Kuvendi i Kosovës të mbështesë rezolutën e Asamblesë së Përgjithshme të Kombeve të Bashkuara që cakton një ditë për “Ditën Ndërkombëtare të Kujtimit dhe Përkujtimit të Gjenocidit të vitit 1995 në Srebrenicë”.
Hoxhaj theksoi rëndësinë e angazhimit të Kosovës për të përkujtuar dhe dënuar ngjarjet tragjike të gjenocidit, pavarësisht mungesës së një ulëse në OKB.
“Duke mos qenë anëtare e OKB-së ku do të ishim përkrahës të natyrshëm të kësaj rezolute, kjo është mënyra më e mirë për Kosovën që t’i bashkohet botës demokratike në dënimin dhe përkujtimin e gjenocidit në Srebrenicë,” u shpreh Hoxhaj.
Ai vazhdoi të theksonte nevojën për ballafaqimin me të kaluarën dhe për të bërë të ditur se “politika gjenocidale dhe serbomadhe e Beogradit ndaj Kosovës, Bosnjës dhe Kroacisë, duhet të ndëshkohet dhe përkujtohet, me qëllim që ajo kurrë të mos rikthehet në rajon”.
Propozimi i Hoxhajt erdhi si përgjigje në mbështetje të përpjekjeve globale për të siguruar që tragjeditë e tilla njerëzore të mos harrohen dhe për të ndërtuar një të ardhme më të ndritur bazuar në kujtesën dhe mësimet e të kaluarës.
Pritet që ky propozim të diskutohet më tej në seancat e ardhshme të Kuvendit të Kosovës dhe të marrë përkrahje të gjerë nga të gjitha palët politike.
