Presidenti Stevo Pendarovski thotë se asnjëherë, për asnjë ligj, Bashkimi Evropian nuk ka reaguar me shkrim që të mos keqpërdoret flamuri evropian në përgjithësi para se ai ligj të miratohej, siç BE-ja veproi tani, në këtë rast, në lidhje me Ligjin për ndryshimin dhe plotësimin e Ligjit për Lojërat e Fatit dhe Lojërat Argëtuese.
Pendarovski në kumtesën nga kabineti i tij thekson se shkresa në të cilën qartë thuhet se nuk është respektuar procedura, përkatësisht letra nga Bashkimi Evropian para se t’i dërgohet presidentit, gjithashtu i është dërguar edhe Qeverisë dhe Kuvendit.
“Zëvendëskryeministri Artan Grubi si dhe të gjithë anëtarët e Qeverisë do të duhej të jenë të njoftuar me këtë shkresë”, thekson Pendarovski.
Lidhur me ndryshimet në Kodin Penal, Pendarovski thotë se ka pasur një direktivë të qartë evropiane për konfiskimin e pasurisë së fituar me krim.
“Konkretisht, në atë pjesë, ndryshimet e Kodit janë harmonizuar me Direktivën evropiane për ngrirjen dhe konfiskimin e gjësendeve dhe përfitimeve pasurore, e cila përveç dënimit e burg, fokusin e vë në konfiskimin e përfitimeve pasurore nga kryerësit e këtyre veprave penale”, thekson presidenti i shtetit.
