Shkup, 2 korrik – Paratë “heshtën”, por foliot lanë gjurmët e gjyqtarit Gjoko Ristov. Detaje të reja nga gjykimi ndaj gjyqtarit të Apelit rikthyen në qendër të vëmendjes rastin e 350 mijë eurove të gjetura të fshehura në murin e një shtëpie familjare në Negotinë, pasi ekspertët e Ministrisë së Punëve të Brendshme dëshmuan se në foliot e aluminit me të cilat ishin mbështjellë paratë janë gjetur gjurmë biologjike të tij.
Bëhet fjalë për para të paketuara në kartëmonedha prej 500 dhe 200 eurosh, të cilat, sipas Prokurorisë, ishin fshehur në një mur, pas pllakave dhe elementeve të kuzhinës. Ristov akuzohet për përfitim të kundërligjshëm dhe fshehje të pasurisë, si dhe për pastrim parash, ndërsa para gjykatës është deklaruar i pafajshëm.
Në seancën gjyqësore, siç raportoi televizioni Televizioni Telma, ekspertët sqaruan se për analizë ishin dorëzuar 13 mostra, por vetëm dy prej tyre ishin të përshtatshme për ekzaminim forenzik. Nga analiza u konstatua se gjurmët biologjike i përkisnin Gjoko Ristovit dhe një personi tjetër të panjohur, i cili nuk ka lidhje gjaku me të.
Për Prokurorinë, ky është një moment i rëndësishëm provues. Prokurorja Iskra Haxhi Vasileva vlerësoi se analiza e ADN-së e forcon më tej lidhjen mes të akuzuarit dhe pakove me para. Sipas saj, nëse në material ekzistojnë gjurmë biologjike, ato mbeten të vlefshme pavarësisht pranisë së gjurmëve të personave të tjerë.
Mbrojtja, ndërkaq, e kundërshton mënyrën e administrimit të provave. Avokati Zvonko Davidoviq ngriti pyetje se si është hequr dhe ruajtur materiali, përse foliot janë mbajtur në qese dhe përse nuk është kryer ekspertizë edhe mbi vetë kartëmonedhat. Sipas mbrojtjes, mënyra e trajtimit të provave duhet të verifikohet me kujdes, sidomos kur bëhet fjalë për një shumë kaq të madhe parash.
Që nga fillimi, rasti ka tërhequr vëmendje të madhe të opinionit publik, jo vetëm për shkak të shumës prej 350 mijë eurosh, por edhe sepse i akuzuari është gjyqtar i Gjykatës së Apelit. Prokuroria pretendon se paratë përbëjnë pasuri të padeklaruar dhe se vlera e tyre tejkalon ndjeshëm të ardhurat e ligjshme të Ristovit.
Nga ana tjetër, mbrojtja këmbëngul se aktakuza ndërton një narrativë sensacionaliste dhe se me dokumente do të dëshmojë se paratë nuk i përkasin gjyqtarit, por kanë një origjinë tjetër. Ristov vazhdon të mohojë fajësinë për fshehje pasurie dhe pastrim parash.
Seanca e radhës është caktuar për 14 korrik, kur pritet të dëshmojë edhe një ekspert tjetër i Ministrisë së Punëve të Brendshme dhe të vazhdojë paraqitja e provave nga Prokuroria.
Ky proces konsiderohet më shumë sesa një gjykim për një shumë parash. Ai shihet si një test për besimin e qytetarëve në sistemin e drejtësisë dhe për aftësinë e institucioneve për t’iu përgjigjur pyetjes që prej ditës së parë ka ngjallur interes publik: kujt i përkisnin 350 mijë eurot dhe si përfunduan të fshehura brenda një muri? përcjell Zhurnal.mk .
