Kryetari i Qytetit të Shkupit, Orce Gjorgjievski, ka kërkuar reagim urgjent nga Ministria e Punëve të Brendshme pas djegies së disa kontejnerëve në lagjen Novo Lisiçe dhe në bulevardin “Brigada Maqedono-Kosovare”.
Përmes një reagimi në Facebook, Gjorgjievski e ka cilësuar këtë veprim si vandalizëm dhe sulm ndaj pronës së përbashkët të qytetarëve.
Ai theksoi se qyteti ka siguruar 3.300 kontejnerë të rinj dhe se dëmtimi i tyre shkakton humbje për të gjithë qytetarët e Shkupit.
Gjorgjievski i bëri thirrje MPB-së që të shqyrtojë menjëherë pamjet nga kamerat e sistemit “Safe City”, të identifikojë autorët dhe të hetojë nëse djegiet janë të organizuara apo kanë motive politike.
Ai paralajmëroi gjithashtu se së shpejti do të përfundojë vendosja e 200 kamerave të qytetit, me qëllim forcimin e mbikëqyrjes dhe parandalimin e rasteve të tilla.
“Shkupi nuk do të jetë peng i vandalëve”, ka shkruar Gjorgjievski, duke kërkuar përgjegjësi për dëmtimin e pronës publike.
