Qeveria, përmes Ministrisë së Transportit, ka realizuar furnizimin me 100 automjete të reja për nevojat e Postës së Maqedonisë. Ky vendim vjen si përgjigje ndaj gjendjes së vështirë ekzistuese, pasi automjetet e deritanishme kishin një moshë mesatare prej rreth 15 vitesh, duke shkaktuar defekte të shpeshta, kosto të larta dhe efikasitet të ulët.
Me këtë investim pritet përmirësim i dukshëm në shërbimet postare – dërgesa më të shpejta, më të sigurta dhe më efikase për qytetarët dhe bizneset në të gjithë vendin. Gjithashtu, do të ulen shpenzimet e mirëmbajtjes dhe do të rritet produktiviteti.
Ky hap është pjesë e një strategjie më të gjerë për modernizimin e institucioneve publike dhe rritjen e cilësisë së shërbimeve. Në kuadër të Planit për Rritje, synohet ulje e kostove dhe rritje e efikasitetit dhe përfitimit me rreth 15%.
Siç theksoi kryeministri Hristijan Mickoski, ky investim nuk është vetëm blerje automjetesh, por një hap drejt modernizimit të institucioneve dhe rritjes së efikasitetit të shërbimeve publike.
Autoritetet theksojnë se kjo është vetëm fillimi i reformave që do ta kthejnë Postën e Maqedonisë në një institucion modern, të besueshëm dhe të gatshëm për sfidat e kohës, veçanërisht në epokën e transformimit digjital dhe zhvillimit të tregtisë elektronike.
