Shqipëria po shndërrohet me shpejtësi në një nga destinacionet më të kërkuara turistike të Evropës, duke tërhequr vëmendjen e medieve ndërkombëtare dhe vizitorëve nga e gjithë bota, sipas revistës spanjolle “Noticias del Vino”.
E vendosur në zemër të Ballkanit dhe e pasur me peizazhe të larmishme, nga brigjet e kristalta të Rivierës Shqiptare deri te Alpet madhështore në veri, vendi po fiton gjithnjë e më shumë reputacionin e një “perle të fshehur” që ofron përvoja autentike, çmime të përballueshme dhe mikpritje tradicionale.
Rritja e interesit turistik, veçanërisht gjatë muajve të verës, e ka pozicionuar Shqipërinë si një nga “surprizat” më të mëdha të turizmit mesdhetar të viteve të fundit.
Shqipëria është shndërruar në një fenomen viral në “TikTok” për një arsye të dukshme: është i vetmi vend në Mesdhe ku mund të drekoni ose darkoni përballë detit për vetëm 10 euro.
Shqipëria është një ndër vendet më të bukura të Ballkanit. Është një vend ku bashkëjetojnë bunkerët komunistë, xhamitë osmane dhe plazhet që do të konkurronin denjësisht edhe me ishujt e famshëm të Tajlandës.
Riviera Shqiptare: “Karaibet” që nuk kanë nevojë për filtra
Kur njerëzit pyesin çfarë mund të shohësh në Shqipëri, 90% prej tyre mendojnë për jugun. Riviera Shqiptare është segmenti bregdetar që shtrihet nga Vlora deri në Ksamil, dhe këtu duhet të jenin strategjik.
Ksamili është xhevahiri i kurorës, me tre ishujt e tij ku mund të shkoni për të notuar.
Nëse kërkoni diçka më autentike, Dhërmiu është vendi ideal. Ujërat e tij janë po aq të kaltra, por atmosfera është shumë më e qetë.
Trekëndëshi historik: Berati, Gjirokastra dhe Butrinti
Shqipëria nuk ofron vetëm plazhe mahnitëse. Berati, i njohur si “qyteti i një mbi një dritareve”, është pjesë e Trashëgimisë Botërore të UNESCO-s dhe është një vend magjik.
Shtëpitë e bardha osmane duken sikur ngjiten në mal deri te kalaja, e cila ende është e banuar.
Disa orë më larg ndodhet Gjirokastra, qyteti gurtë, ku lindi diktatori Enver Hoxha. Rrugicat me kalldrëm rrëshqasin, por pamjet mbi luginën e Drinos të lënë pa frymë.
Dhe nëse jeni një adhurues i rrënojave, Butrinti është një domosdoshmëri në listën e vendeve që duhet të vizitoni në Shqipëri.
Në parkun arkeologjik ndërthuren mbetjet greke, romake dhe bizantine, i rrethuar nga një lagunë e egër.
Alpet Shqiptare: sekreti më i ruajtur i veriut
Nëse adhuroni ecjet malore ose thjesht ajrin e pastër, duhet të bëni rrugën Theth – Valbonë.
Është një nga shëtitjet më spektakolare të Ballkanit – ku do të rrethoheni nga maja të thepisura, që mund të krahasohen lehtësisht me Zvicrën, dhe me mikpritjen e “kullave” (shtëpi tradicionale guri), ku do t’ju presin me kafe turke dhe raki shtëpie.
Si filim, duhet të kaloni Liqenin e Komanit me një traget. Është ndoshta udhëtimi më i bukur me anije që do të bëni ndonjëherë për më pak se 10 euro.
Muret vertikale të shkëmbinjve që zhyten në ujërat smerald do t’ju mbeten gjatë në kujtesë.
Tirana: qyteti me ngjyra që të tërheq
Tirana është e zhurmshme, plot ngjyra dhe magjepsëse. Pas rënies së komunizmit, kryetari i bashkisë vendosi të pikturojë ndërtesat gri sovjetike, me ngjyra të gjalla për të përmirësuar moralin e qytetarëve.
Vizitoni Bunk’Art, një bunker atomik gjigant nëntokësor, i kthyer në muze arti dhe historie. Është klaustrofobik, por thelbësor për të kuptuar 40 vitet e izolimit që ka kaluar vendi.
Në mbrëmje, vizitoni lagjen e Bllokut. Dikur ishte zona e ndaluar ku jetonte elita e partisë; sot është zona më elegante e qytetit, plot bare moderne dhe njerëz me stil.
Syri i Kaltër dhe mrekullitë e natyrës
Nëse udhëtoni drejt jugut, do të hasni Syrin e Kaltër, një burim natyror, i njohur për ujin e tij të kristaltë, ngjyrën e kaltër-smerald dhe temperaturën shumë të ftohtë (rreth 10-12°C)
Askush nuk e di saktësisht sa i thellë është (zhytësit kanë zbritur mbi 50 metra dhe vazhdon ende).
Është e ndaluar të notosh, sepse uji është rreth 10 gradë, por gjithmonë do të shihni dikë që hidhet nga platforma prej druri.
Afër ndodhen edhe Banjat e Bënjës. Pishina natyrore me ujë sulfurik nën një urë osmane të shekullit XVII, është një spa e jashtëzakonshme falas.
A është e sigurt të udhëtosh në Shqipëri?
Harrojini paragjykimet e viteve ’90. Shqipëria është një nga vendet më të sigurta në Evropë për të udhëtuar vetëm ose me miq.
Rreziku më i madh është që të mos duash të largohesh më, ose të mësohesh me kafen 50 cent.
Shqipëria po ndryshon shpejt. Hotelet luksoze po shfaqen me shpejtësi dhe autenticiteti ka një afat përfundimi.
Nëse dëshiron të zbulosh thelbin e vërtetë të Ballkanit, filloni të rezervoni biletat tani. Sepse, sapo bota të mësojë rreth Shqipërisë, ky vend nuk do të jetë më “sekreti” që është sot./Atsh/KultPlus.com
