Drejtoresha e Arkivit Shtetëror të Maqedonisë, profesoresha Natasha Kotlar Trajkova, u shkarkua nga detyra që kishte mbajtur për një vit e katër muaj, përmes një telefonate nga kabineti i Kryeministrit, pa dhënë asnjë arsyetim. Ngjarja ndodhi dje, ndërsa Kotlar Trajkova ishte në vendin e saj të punës.
Sipas saj, shkarkimi lidhet me një intervistë që dha në muajin gusht, ku shprehu qëndrim kritik ndaj diasporës maqedonase në Australi. Ajo për televizionin 24 tha:
“Nga ora 12:04 dje, ndërsa isha në vendin tim në Arkivin Shtetëror të RM-së, më telefonoi një zonjë që u prezantua si sekretare nga kabineti i Kryeministrit. Më informoi se nga momenti i telefonatës nuk do të jem më drejtoreshë. Më vonë, gjatë një komunikimi me kryeministrin, mora vesh se arsyeja kryesore për shkarkimin tim ishte opinioni kritik që shpreha në intervistën për diasporën në Australi.”
Kotlar Trajkova shtoi se një arsye tjetër për shkarkimin ishte ambicia e zëvendësdrejtorit të emëruar nga radhët e VMRO-DPMNE, i cili kishte synim të merrte drejtimin e Arkivit. Ajo theksoi se gjatë drejtimit të saj ka përballuar shumë sfida dhe ndikime të jashtme.
“Që nga dita e emërimit tim më 31 korrik 2024, një person partiak u emërua si zëvendësdrejtor dhe kishte ambicie serioze për t’u bërë drejtor. Që atëherë filloi një periudhë e gjatë, një odise e një viti e katër muaj, me një lloj torturë psikologjike. Çdo ditë ndodhnin situata që tregonin se nuk kisha mbështetje dhe se politika e Arkivit duhet të miratohej nga zëvendësi,” tha Kotlar Trajkova.
Në zgjedhjet lokale të vitit 2021, Natasha Kotlar Trajkova ishte kandidate për kryetare të komunës Qendër nga radhët e VMRO-DPMNE.
