Këshilltari i Zaevit, Viktor Petrushevski, përmendet në aferën aktuale në Kosovë për bashkëpunim me shërbimin serb BIA
Emri i Viktor Petruševskit, ish-këshilltarit të kryeministrit të atëhershëm Zoran Zaev për vetëqeverisje lokale, është përmendur në aferën aktuale të raportuar nga mediat në Kosovë lidhur me dyshimet për bashkëpunimin e analistit të njohur politik Fatmir Sheholli me Agjencinë serbe të Sigurisë dhe Informacionit (BIA).
Prokuroria Speciale e Kosovës më 25 gusht ngriti aktakuzë ndaj Fatmir Shehollit për veprat penale të spiunazhit dhe shantazhit.
Sheholli, i cili gjatë periudhës së Millosheviqit ka punuar në media, ka përvojë të njohur në strukturat serbe të sigurisë, ndërsa në Kosovë ka ushtruar funksione dhe ka qenë këshilltar, si dhe aktivist për marrëdhënie ndëretnike. Ai është i njohur edhe si analist politik në televizionet kosovare.
Sipas Prokurorisë Speciale të Kosovës, më 20 dhe 21 dhjetor 2024, Sheholli ka komunikuar përmes WhatsApp-it me Viktor Petrushevskin. Nga këto komunikime, sipas aktakuzës, rezulton se Sheholli ka ndërmarrë hapa për organizimin e një takimi fizik me Bojan Dimiqin, person i lidhur me BIA-n serbe.
Në një komunikim të datës 22 dhjetor 2024, sipas pjesëve të publikuara të aktakuzës, Sheholli i është drejtuar Petrushevskit me mesazhin se duhet të ishte i përgatitur për t’u dhënë përgjigje personave me të cilët do të bisedonte.
Prokuroria pretendon se më 25 dhjetor 2024 takimi është realizuar. Në komunikimet e asaj dite, sipas aktakuzës, Sheholli i ka thënë Petrushevskit se ndodhej në një restorant dhe më pas i ka dërguar numrin e telefonit, për të cilin hetuesit kanë përcaktuar se përdorej nga Bojan Dimiq.
Prokuroria kosovare e identifikon Dimiqin si zyrtar të BIA-s, ndërsa burime të tjera në Kosovë e përshkruajnë atë si drejtor të Drejtorisë për Luftimin e Terrorizmit dhe Krimit të Organizuar Ndërkombëtar në kuadër të shërbimit serb të sigurisë.
Një tjetër element i aktakuzës e lidh kontaktin e regjistruar si “Viktor Maqedonia” me Petrushevskin.
Sipas aktakuzës, më 5 gusht 2025 Sheholli i ka dërguar një dokument të shënuar si “Top Secret 2” një personi të regjistruar në telefonin e tij me emrin “Viktor Maqedonia”.
Mediat kosovare raportojnë se dokumenti përmbante një plan të pretenduar politik dhe strategjik lidhur me përhapjen e radikalizmit islamik në Kosovë dhe rajon. Në të flitej për ndërtimin dhe zgjerimin e objekteve fetare, si dhe për krijimin e rrjeteve me ndikim në sport, media, muzikë dhe politikë.
Sipas Prokurorisë, dokumenti ishte pjesë e materialeve më të gjera që synonin të dëshmonin se çfarë informacionesh dhe dokumentesh shkëmbente Sheholli me persona të lidhur me strukturat serbe të sigurisë.
Petrushevski: Me Shehollin kam biseduar për biznes
Viktor Petrushevski, në një deklaratë për TV Alsat, ka mohuar çdo lidhje me ndonjë rrjet të inteligjencës dhe ka thënë se me Shehollin ka komunikuar për çështje biznesi.
“Me Fatmirin jam njohur para 2-3 vitesh në një takim ku ishte edhe ai. Atëherë më është prezantuar si drejtor i një instituti. Pas një periudhe filluam të komunikojmë për zhvillimet politike dhe ekonomike në rajon”, ka deklaruar Petrushevski për Alsat.
Sipas tij, Sheholli më vonë ishte interesuar më konkretisht për aktivitetet e tij biznesore, veçanërisht në periudhën kur ishte aktuale çështja e qymyrit.
Petrushevski thotë se Sheholli i kishte treguar se kishte lidhje të forta në Serbi dhe se mund ta lidhte me persona që mund ta ndihmonin në biznes.
“Ma dërgoi kontaktin e një personi nga Serbia. Kur kuptova se për kë bëhej fjalë dhe se ai nuk kishte lidhje me këtë biznes, vendosa të mos kontaktoj kurrë me të”, ka deklaruar Petrushevski.
Ai shton se Sheholli i kishte rekomanduar kontakt edhe me disa persona të tjerë, me të cilët, sipas tij, kishte pasur një takim të shkurtër, por nuk kishte vazhduar komunikimin.
Çfarë pretendon Prokuroria Speciale?
Një pamje dukshëm ndryshe paraqitet në materialet e aktakuzës.
Prokuroria Speciale e Kosovës më 25 gusht ngriti aktakuzë ndaj Fatmir Shehollit për dy vepra penale – spiunazh dhe shantazh.
Sipas aktakuzës, Sheholli ishte rekrutuar nga BIA serbe dhe deri në arrestimin e tij në tetor 2025 kishte vepruar sipas urdhrave dhe detyrave të zyrtarëve të kësaj agjencie.
Prokuroria pretendon se ai kishte mbledhur dhe përcjellë të dhëna, informacione dhe dokumente lidhur me aktivitetet politike, situatën e sigurisë dhe funksionimin e institucioneve të Kosovës.
Sheholli akuzohet gjithashtu për shantazh ndaj një personi nga Kosova, nga i cili, sipas aktakuzës, kishte kërkuar më shumë se 13 mijë euro.
Rasti ndodhet para Gjykatës Themelore në Prishtinë, ndërsa seanca e parë është caktuar për 7 shtator.
Kush është Viktor Petrushevski?
Petrushevski ka qenë drejtor i SHA “Shërbimet e Aeroporteve”, ndërsa në janar të vitit 2021 u emërua këshilltar i kryeministrit Zoran Zaev për vetëqeverisje lokale.
Në raportimet aktuale të mediave kosovare, Petrushevski përshkruhet si biznesmen nga Maqedonia e Veriut.
Alsat raportoi se aktualisht ai merret me biznes në sektorin e derivateve të naftës dhe ndërtimtarisë. Televizioni, duke iu referuar verifikimeve të veta, ka bërë të ditur se në evidencën e tij kriminale figuron vetëm një kallëzim zyrtar penal, i datës 24 nëntor 2005.
Akuzat e VMRO-DPMNE-së në vitin 2017
Emri i Petrushevskit ishte përmendur edhe më herët në një deklaratë politike të VMRO-DPMNE-së.
Më 18 prill 2017, kjo parti pretendoi se Viktor Petrushevski, atëherë anëtar i Bordit Ekzekutiv të LSDM-së dhe drejtues në “Kumanovo Gas”, ishte ndaluar nga doganierët serbë me një shumë të madhe parash.
VMRO-DPMNE pretendonte se Petrushevski kishte tentuar ta fshihte shumën nga doganierët maqedonas, por ishte zbuluar nga autoritetet serbe. Partia ngriti pyetje se kujt i përkisnin paratë dhe për kë ishin destinuar.
Në atë kohë, nga VMRO-DPMNE-ja u ngritën edhe pretendime se paratë mund të ishin të destinuara për organizatën joqeveritare serbe CANVAS dhe fondacionin Soros, të cilat partia i akuzonte për organizimin e “Revolucionit Laraman” në Maqedoni.
Këto pretendime të vitit 2017 ishin akuza politike të VMRO-DPMNE-së dhe nuk përbëjnë, në vetvete, konstatim gjyqësor për fajësi.
Ndërkohë, në rastin aktual në Kosovë, emri i Viktor Petrushevskit përmendet në kuadër të materialeve të aktakuzës ndaj Fatmir Shehollit. Petrushevski i mohon akuzat për çdo lidhje me rrjetet e inteligjencës, ndërsa përfshirja e tij dhe kuptimi i kontakteve të përmendura në aktakuzë mbeten çështje që duhet të vlerësohen në procedurën gjyqësore./MKD.mk
