Ylli i Barcelonës vazhdon të shkruajë histori, duke u shpallur për të tretin vit radhazi futbollisti më i mirë U21 në botë.
Lamine Yamal ka fituar për të tretin vit radhazi Trofeun Kopa, çmimin prestigjioz që i jepet futbollistit më të mirë në botë nën moshën 21-vjeçare.
Talenti i Barcelonës e fitoi këtë çmim edhe në vitet 2024 dhe 2025, ndërsa tashmë e shton në koleksionin e tij edhe trofeun e vitit 2026, duke arritur një sukses të jashtëzakonshëm në karrierën e tij të re.
Në votimin e këtij viti, numri 10 i Barcelonës la pas kandidatë të tjerë të talentuar, mes tyre Pau Cubarsí, Yan Diomandé, Lennart Karl, Ayyoub Bouaddi dhe Johan Manzambi.
Gjatë periudhës së vlerësimit, Yamal regjistroi statistika mbresëlënëse, me 25 gola dhe 20 asistime në 57 ndeshje, duke dëshmuar edhe një herë rëndësinë e tij në skuadrën katalanase.
Përveç paraqitjeve individuale, ai pati rol të rëndësishëm edhe në sukseset e Barcelonës, përfshirë triumfin në La Liga dhe fitimin e Superkupës së Spanjës pas finales kundër Real Madridit.
Me këtë çmim të tretë radhazi, Lamine Yamal konfirmon statusin e tij si një prej talenteve më të spikatura të futbollit botëror dhe vazhdon të ndërtojë një karrierë që premton shumë për të ardhmen. Ora24.tv
