Më 7 nëntor 1922, në Leusë të Përmetit, lindi gjuhëtari, profesori dhe akademiku Androkli Kostallari, një prej figurave më të rëndësishme të gjuhësisë shqiptare.
Kostallari kreu gjimnazin në Shkodër dhe Tiranë, ndërsa më pas u përfshi në Luftën Antifashiste Nacionalçlirimtare. Studimet e larta filologjike i përfundoi në Universitetin “Lomonosov” të Moskës, në vitin 1954.
Për dekada me radhë, ai dha një kontribut të jashtëzakonshëm në zhvillimin e gjuhësisë shqiptare, duke drejtuar Institutin e Gjuhësisë dhe Letërsisë dhe duke shërbyer si dekan i Fakultetit të Historisë dhe Filologjisë. Ai ishte gjithashtu një nga anëtarët themelues të Akademisë së Shkencave të Shqipërisë.
Emri i tij lidhet veçanërisht me hartimin e veprave madhore të leksikografisë shqiptare, përfshirë “Fjalorin e gjuhës së sotme shqipe” (1980) dhe “Fjalorin e shqipes së sotme” (1984). Ai luajti rol të rëndësishëm edhe në procesin e standardizimit të gjuhës shqipe dhe në organizimin e Kongresit të Drejtshkrimit të vitit 1972.
Për meritat e tij shkencore dhe akademike, Kostallari u nderua me titullin “Mësues i Popullit”, si dhe me titullin “Doctor Honoris Causa” nga Universiteti i Goteborgut në Suedi.
Akademik Androkli Kostallari u nda nga jeta në Tiranë, në mars të vitit 1992, duke lënë pas një trashëgimi të çmuar në gjuhësinë dhe kulturën shqiptare./KultPlus.com
