Temperaturë e lartë, kollë, rrjedhje e hundës dhe skuqje e syve – këto janë disa nga shenjat e para të fruthit, një sëmundje virale shumë ngjitëse që mund të shkaktojë komplikime serioze, veçanërisht te fëmijët e vegjël.

Fruthi, i njohur edhe si morbili, përhapet përmes ajrit kur një person i infektuar kollitet, teshtin apo merr frymë. Sipas Organizatës Botërore të Shëndetësisë (OBSH), kjo sëmundje mund të shkaktojë pasoja të rënda shëndetësore dhe në raste të caktuara edhe vdekje.

Cilat janë simptomat e para?

Simptomat zakonisht shfaqen 7 deri në 14 ditë pas kontaktit me virusin. Shenjat më të zakonshme janë temperatura e lartë, kolla e vazhdueshme, rrjedhja e hundës, sytë e skuqur dhe të përlotur, si dhe njollat e vogla të bardha brenda gojës.

Rreth 3 deri në 5 ditë pas shfaqjes së simptomave të para, në lëkurë fillojnë të paraqiten njolla të kuqe, fillimisht në fytyrë dhe më pas në qafë, trup, duar dhe këmbë.

Çfarë komplikimesh mund të shkaktojë fruthi?

Edhe pse shumë pacientë shërohen, fruthi mund të shkaktojë komplikime serioze, si pneumonia, infeksionet e veshit, diarreja e rëndë dhe dehidratimi.

Në raste më të rënda mund të shkaktojë inflamacion të trurit (encefalit), dëmtim të shikimit dhe pasoja neurologjike afatgjata.

Sipas OBSH-së, rreziku i komplikimeve është veçanërisht i lartë te fëmijët nën moshën pesëvjeçare, gratë shtatzëna dhe personat me sistem imunitar të dobësuar.

Si mund të parandalohet?

Mënyra më efektive për parandalimin e fruthit është vaksinimi me vaksinën MRP (kundër fruthit, rubeolës dhe shytave).

Ekspertët shëndetësorë rekomandojnë që prindërit të kontrollojnë nëse fëmijët i kanë marrë dozat e nevojshme të vaksinës sipas kalendarit të imunizimit.

Nëse dyshohet për infektim, duhet të kontaktohet mjeku paraprakisht, për të shmangur përhapjen e virusit te pacientët e tjerë.

Fruthi nuk duhet nënvlerësuar, pasi një sëmundje që fillimisht mund të ngjajë me një ftohje të zakonshme, në disa raste mund të çojë në komplikime të rrezikshme për jetën.

Ora24.tv