Skeleti i një dinosauri të rrallë, i njohur si Nanotyrannus, është shitur për 47.3 milionë dollarë në një ankand të organizuar nga shtëpia e ankandeve Sotheby’s në Nju Jork.
Skeleti i dinosaurit është rreth 3 metra i gjatë dhe përbëhet nga rreth 191 elemente fosile kockore. Ai u shit pas një ankandi që zgjati 12 minuta, ku morën pjesë gjashtë palë të interesuara. Identiteti i blerësit nuk është bërë i ditur.
Para ankandit, skeleti vlerësohej të shitej për të paktën 9 milionë dollarë. Shitja përfundimtare e rendit atë ndër fosilet më të shtrenjta të dinosaurëve të shitura ndonjëherë.
Nanotyrannus dikur ngatërrohej me një ekzemplar të ri të Tyrannosaurus rex, por studimet e fundit kanë mbështetur klasifikimin e tij si një gjini më vete. Sipas Sotheby’s, ky është një nga vetëm tre skeletet e këtij lloji të njohura nga shkenca.
Shitja ka rikthyer debatin në komunitetin shkencor mbi tregtimin privat të fosileve dhe rëndësinë e ekspozimit të tyre publik për studime dhe kërkime shkencore.
Në korrik, Sotheby’s shiti një skelet Tyrannosaurus rex, të quajtur Gus, për 50.1 milionë dollarë, ndërsa në korrik të vitit 2024, një skelet Stegosaurus, i quajtur Apex, u shit për 44.6 milionë dollarë.
Tyrannosaurus rex dhe Nanotyrannus kanë jetuar në të njëjtën periudhë gjeologjike, rreth 67 milionë vjet më parë.
