Mbrojtës i natyrës sonë, tha sonte ministri i Kulturës dhe Turizmit, Sedat Sulejmani në Akademinë solemne me rastin e 100 vjetorit të Muzeut Natyror-Shkencor, që po mbahet në Teatrin Kombëtar Maqedonas në Shkup. Ministri Sulejmani shtoi se trashëgimia kulturore dhe natyrore nuk janë sfera të ndara, por dy anë të të njëjtit identitet.
“Njëqind vjet ekzistencë e një institucioni, i cili është njëkohësisht mbrojtës i natyrës sonë, një laborator i dijes dhe një hapësirë në të cilën breza të rinjsh kanë zbuluar kompleksitetin dhe bukurinë e botës së gjallë përreth tyre”, theksoi Sulejmani në fjalimin e tij para të pranishmëve.
Ministri kujtoi se, i themeluar në vitin 1926 me iniciativën e dr. Stanko Karaman, Muzeu Natyror-Shkencor është institucioni më i vjetër biologjik në vend. Ai theksoi se gjatë një shekulli, trazirave shoqërore dhe ndryshimeve teknologjike, muzeu i ka mbetur besnik misionit të tij – të mbledhë, studiojë, ruajë dhe prezantojë pasurinë natyrore të vendit.
Ky Muze, tha ai, është një shkollë pa mure, një vend ku fëmijët takohen për herë të parë me specie endemike, ku shkencëtarët e rinj mësojnë të bëjnë kërkime dhe qytetarët ripërtërijnë vetëdijen e tyre për brishtësinë e natyrës.
Njëqind vite, tha janë rrugë e gjatë. Por, ato janë edhe fillim i llojit të vet.
“Përballemi me detyrën për t’ia kaluar këtë institucion brezit të ardhshëm, edhe më të fortë, më të hapur dhe më të aftë për t’iu përgjigjur sfidave të epokës së re. Së fundmi, më lejoni të shpreh mirënjohjen time të sinqertë për të gjithë ata që ndërtuan, ruajtën dhe zhvilluan këtë muze. Në emër të Ministrisë së Kulturës dhe Turizmit dhe në emrin tim personal, ju uroj shumë dekada të tjera pune të frytshme në shërbim të dijes dhe në shërbim të natyrës”, tha ministri.
