Borxhi i qytetarëve ndaj bankave arrin në 4,93 miliardë euro – çdo banor “i detyrohet” mesatarisht 2.723 euro

Borxhi i përgjithshëm i qytetarëve ndaj bankave, deri në fund të muajit shtator, është sërish në rritje, tregojnë të dhënat e Bankës Popullore. Sipas këtyre të dhënave, borxhi mesatar arrin të paktën 2.700 euro për çdo banor. Qytetarët e Maqedonisë, vetëm në bazë të kredive dhe huave, kanë një borxh prej 4,93 miliardë eurosh, shumë kjo që është afërsisht sa dy të tretat e buxhetit të përgjithshëm vjetor të shtetit të Republikës së Maqedonisë së Veriut.

Këto të dhëna të Bankës Popullore e rikthejnë në vëmendje temën e seriozitetit të mbingarkesës me borxhe, përpara fillimit të masave të reja kufizuese të Bankës Popullore, të cilat hyjnë në fuqi më 1 dhjetor.

Nëse borxhi prej 4,9 miliardë eurosh ndahet në mënyrë të barabartë për frymë, duke marrë parasysh vetëm popullsinë rezidente prej rreth 1,81 milion banorësh, atëherë çdo qytetar i vendit, pavarësisht moshës, formalisht „ka borxh“ rreth 2.723 euro vetëm nga kreditë dhe huatë bankare.

Kur kësaj shume i shtohet edhe borxhi i kompanive prej 4,90 miliardë eurosh, borxhi i përbashkët i ekonomisë maqedonase dhe i qytetarëve arrin gjithsej në 9,87 miliardë euro, ndërsa depozitat e përgjithshme në sistemin bankar kapin vlerën prej 11,15 miliardë eurosh.