Filmi spanjoll “La Bola Negra”, që rrëfen historitë e tre burrave homoseksualë në periudha të ndryshme të historisë së Spanjës, po shihet si një nga pretendentët për çmimin Oscar për filmin më të mirë.
Me regji nga Javier Calvo dhe Javier Ambrossi, drama ndërthur historinë, dashurinë, kujtesën dhe represionin seksual, duke krijuar një rrëfim që shtrihet përgjatë gati një shekulli. Pas pritjes së ngrohtë nga kritika dhe publiku në festivalet ndërkombëtare, filmi po tërheq vëmendjen si një kandidat që mund të sfidojë favoritët e tjerë të garës.
Sipas BBC-së, një nga arsyet kryesore që e bëjnë filmin pretendent serioz është pritja e jashtëzakonshme që ka marrë që nga premiera në Festivalin e Filmit në Kanë. Ai fitoi çmimin për regjinë, të ndarë mes dy regjisorëve të tij dhe regjisorit polak Paweł Pawlikowski, si dhe Çmimin e Publikut në Festivalin e Filmit në Toronto. Suksesi është reflektuar edhe në kinematë spanjolle, ku të ardhurat nga shitja e biletave u rritën gjatë fundjavës së dytë të shfaqjes.
Në qendër të filmit janë tri histori të vendosura në vitet 1932, 1937 dhe 2017. Carlosi është një i ri që përballet me paragjykimet për seksualitetin e tij, Sebastiani një ushtar gjatë Luftës Civile Spanjolle që përjeton një dashuri të ndaluar, ndërsa Alberti është një historian që zbulon lidhje të papritura me të kaluarën e familjes së tij. Përmes këtyre personazheve, filmi trajton dhunën homofobike, frikën dhe heshtjen, por edhe dëshirën për të dashuruar dhe për të jetuar pa u fshehur.
Një tjetër element që e veçon produksionin janë interpretimet e aktorëve. Álvaro Lafuente Calvo, i njohur si Guitarricadelafuente, debuton në aktrim në rolin e Sebastianit, duke sjellë në ekran ndjeshmërinë dhe frikën e një personazhi të përndjekur nga e kaluara. Carlos González spikat në rolin e Albertit, ndërsa Penélope Cruz dhe Glenn Close i japin filmit një dimension ndërkombëtar. Cruz interpreton një këngëtare kabareje, në një paraqitje që ka tërhequr vëmendjen edhe në diskutimet për çmimet e Akademisë.
Krahas rrëfimit dhe kastit, “La Bola Negra” shquhet edhe për estetikën vizuale. I xhiruar në film 35 mm, produksioni ndërthur peizazhe të veçanta, fshatra të braktisur dhe ambiente të krijuara posaçërisht, duke i dhënë secilës histori një identitet vizual të veçantë. Skenat e luftës, baret e errëta dhe peizazhet e mbuluara nga bora krijojnë një atmosferë poetike dhe melankolike, që pasqyron gjendjen emocionale të personazheve.
Ambicia artistike bëhet edhe më e dukshme duke marrë parasysh se filmi është realizuar me një buxhet nën 20 milionë dollarë. Fryma e dramave klasike të Hollywood-it, e ndërthurur me një perspektivë bashkëkohore mbi identitetin dhe kujtesën, mund ta bëjë atë veçanërisht tërheqës për votuesit e Akademisë.
Filmi pritet të shfaqet në kinematë amerikane më 16 tetor dhe në ato britanike më 6 nëntor. Me vlerësimet pozitive, suksesin në festivale dhe interpretimet që kanë tërhequr vëmendjen e kritikës, “La Bola Negra” po pozicionohet si një nga titujt që mund të sjellin konkurrencë të fortë në garën për Oscar-in për filmin më të mirë./KultPlus.com
