Ministri i Shëndetësisë, Sasho Klekovski, sot vizitoi kabinetin multidisiplinar për sëmundjet e gjirit, në kuadër të Spitalit Klinik – Shtip.
Gjatë vizitës, Klekovski theksoi se çdo vit, pothuajse një mijë gra sëmuren nga kjo sëmundje.
– Në muajin në të cilin po përpiqemi të rrisim ndërgjegjësimin për luftën kundër kancerit të gjirit, një nga llojet më të shpeshta të kancerit, pothuajse një mijë gra në vit diagnostikohen me kancer të gjirit. Kjo përbën një problem të rëndësishëm shëndetësor për gratë dhe për shoqërinë.
Megjithatë, jam këtu edhe për të parë shërbimet e reja që janë vendosur në Spitalin Klinik, laboratorin e ri dhe gamën e re të shërbimeve. Ndërsa javën e ardhshme do të njoftojmë edhe shërbime të reja në Repartin e Neurologjisë.
Qëllimi ynë është që kësaj ndërtese të re, e cila do të ndërtohet, të fillojmë t’i japim përmbajtje, sepse shëndetësinë nuk e përbëjnë ndërtesat, por njerëzit dhe puna e tyre, theksoi Klekovski.
Qëllimi i këtij kabineti është përmirësimi i koordinimit ndërmjet vetë specialistëve, me qëllim ofrimin e një përgjigjeje më të shpejtë dhe më cilësore ndaj nevojave të pacienteve me sëmundje të gjirit.
Gjatë këtij muaji është planifikuar realizimi i 180 mamografive shtesë gjatë fundjavave, me qëllim shkurtimin e listës së pritjes dhe të kohës së pritjes për pacientet.
Në Spitalin Klinik të Shtipit pritet të sigurohet edhe një mamograf i ri, modern, i cili do të mundësojë ofrimin e shërbimeve më cilësore për pacientet nga pjesa lindore e vendit.
