Më 10 tetor shënohet Dita Evropiane e Dhurimit të Organeve, Indeve dhe Qelizave, një ditë që synon të rrisë ndërgjegjësimin për rëndësinë e dhurimit të organeve dhe transplantimit, si dhe të nxisë solidaritetin dhe humanizmin.
Me këtë rast, Maqedonia e Veriut i është bashkuar iniciativës përmes ndriçimit të objekteve dhe institucioneve me ngjyrë të gjelbër, e cila simbolizon shpresën, jetën dhe mundësinë për një fillim të ri.
Dhurimi i organeve është një akt i jashtëzakonshëm human, që mund t’u japë një mundësi të dytë për jetë personave që përballen me sëmundje të rënda dhe presin për transplantim.
Përmes kësaj dite, theksohet rëndësia e informimit të qytetarëve, diskutimit të hapur për dhurimin e organeve dhe mbështetjes së personave që kanë nevojë për transplantim.
Mesazhi i kësaj dite është i qartë: një vendim i marrë nga humanizmi mund të bëhet shpresa e dikujt tjetër për të jetuar.
“Çdo dhurues është shpresë. Çdo ‘po’ është jetë e re.”
