30 shtatori shënohet si Dita Ndërkombëtare e Përkthimit, një ditë e caktuar për të vlerësuar punën e përkthyesve, interpretuesve dhe profesionistëve të gjuhës, si dhe rolin e tyre në lidhjen mes njerëzve, gjuhëve dhe kulturave.
Asambleja e Përgjithshme e Kombeve të Bashkuara e shpalli 30 shtatorin Ditë Ndërkombëtare të Përkthimit në vitin 2017, përmes Rezolutës 71/288. Sipas OKB-së, përkthimi profesional kontribuon në lehtësimin e dialogut, mirëkuptimit dhe bashkëpunimit ndërmjet kombeve.
Data lidhet me Shën Jeronimin, përkthyesin e Biblës, i cili konsiderohet pajtori i përkthyesve. Ai vdiq më 30 shtator të vitit 420 pranë Betlehemit.
Përkthimi sot shkon përtej transferimit të fjalëve nga një gjuhë në tjetrën. Ai mundëson qasjen në letërsi, shkencë, informacion dhe kulturë, ndërsa interpretimi gjuhësor është thelbësor në diplomaci, institucione ndërkombëtare dhe komunikimin ndërkulturor.
Edhe Kombet e Bashkuara mbështeten në qindra profesionistë të gjuhës, ndërsa dokumentet e saj publikohen në gjashtë gjuhët zyrtare: arabisht, kinezisht, anglisht, frëngjisht, rusisht dhe spanjisht.
Dita Ndërkombëtare e Përkthimit është një kujtesë se pas çdo komunikimi të suksesshëm mes gjuhëve qëndron puna e profesionistëve që ndërtojnë ura mes kulturave.
