Deputetja e VMRO-DPMNE-së, Biserka Zlateska, gjatë seancës parlamentare për pyetje të deputetëve, ngriti dy çështje, njëra për pagesën e subvencioneve në bujqësi dhe tjetra për masën e uljes së TVSH-së për naftën dizel.
Duke folur për bujqësinë, Zlateska theksoi rëndësinë e subvencioneve për familjet që varen nga prodhimi bujqësor dhe pyeti ministrin përkatës se si po zhvillohet pagesa e subvencioneve për vitin 2026.
Ajo tha se, sipas të dhënave zyrtare të ministrisë, gjatë këtij viti janë realizuar pagesa sipas programit për mbështetje financiare të bujqësisë, ndërsa paralelisht janë bërë pagesa edhe për masa nga programet e viteve të mëparshme.
Pyetja e dytë e deputetes iu drejtua zëvendësministrit të Ekonomisë dhe kishte të bënte me uljen e TVSH-së për dizelin nga 18 në 10 për qind, masë e cila është paraparë të zgjasë deri më 28 shtator.
Zlateska tha se, nëse vazhdojnë rritja e çmimeve të naftës dhe problemet në furnizimin me energji në tregjet botërore, institucionet duhet të jenë të gatshme për masa të reja. Ajo pyeti nëse po shqyrtohet mundësia që ulja e TVSH-së për dizelin të vazhdojë edhe pas 28 shtatorit dhe kërkoi krahasim të çmimeve të dizelit dhe benzinës në Maqedoninë e Veriut me vendet e rajonit.
Në fund, Zlateska vlerësoi se Qeveria dhe ministritë po angazhohen maksimalisht për përballimin e krizës globale.
