Nëse telefoni gjatë mbrëmjes ka ende mjaftueshëm bateri, ndërsa në mëngjes e gjeni me një përqindje dukshëm më të ulët, problemi nuk është domosdoshmërisht bateria e vjetër. Shpesh, një pjesë e konsumit shkaktohet nga aplikacionet dhe funksionet që vazhdojnë të punojnë në sfond.
Në telefonat Android, fillimisht mund të kontrolloni se çfarë po e konsumon baterinë. Te Settings > Battery > Battery usage mund të shihni se cilat aplikacione harxhojnë më shumë energji. Nëse një aplikacion konsumon shumë bateri edhe pse pothuajse nuk e përdorni, mund të jetë duke funksionuar në sfond. Për aplikacione të tilla mund të kufizohet aktiviteti në sfond.
E dobishme është edhe funksioni Adaptive Battery, i cili optimizon përdorimin e baterisë sipas mënyrës se si e përdorni telefonin dhe mund të kufizojë aktivitetin e aplikacioneve që i hapni rrallë. Google rekomandon që ky funksion të mbetet i aktivizuar.
Konsum shtesë të baterisë mund të shkaktojnë edhe Always-On Display, frekuenca e lartë e rifreskimit të ekranit, 5G, aktivizimi i vazhdueshëm i lokacionit, si dhe skanimi për rrjete Wi-Fi dhe pajisje Bluetooth. Çaktivizimi i funksioneve që nuk ju nevojiten gjatë natës mund të ndihmojë në uljen e konsumit kur telefoni është në pritje.
Nëse përdorni iPhone, te Settings > Battery mund të kontrolloni në detaje se cilat aplikacione dhe aktivitete të sistemit kanë konsumuar baterinë. Apple shfaq veçmas edhe konsumin nga aktivitetet në sfond, si sinkronizimi i fotografive, kontrollimi i postës elektronike dhe navigimi.
Gjithashtu, është e rëndësishme që telefoni të mos mbinxehet gjatë karikimit. Temperaturat e larta mund të përshpejtojnë konsumimin e baterisë dhe, me kalimin e kohës, të ndikojnë në kapacitetin e saj.
Prandaj, nëse vëreni se telefoni humb një përqindje të pazakontë të baterisë gjatë natës, fillimisht kontrolloni statistikat e konsumit. Në këtë mënyrë mund të kuptoni më lehtë nëse shkaku është një aplikacion, ndonjë funksion aktiv apo vetë bateria.
