Kryeministri Hristijan Mickoski deklaroi se Shtetet e Bashkuara e konsiderojnë Maqedoninë e Veriut një partner të rëndësishëm në rajon, ndërsa theksoi se gjatë vizitës së tij në Uashington janë diskutuar projekte të mëdha në sektorin e energjetikës dhe infrastrukturës.
Në një intervistë për MIA-n, Mickoski tha se me palën amerikane është diskutuar mundësia e financimit të projekteve Çebren dhe Galishte, si dhe zhvillimi i gazsjellësit që do të lidhte terminalin LNG në Aleksandrupoli me Evropën Qendrore.
Sipas tij, diskutime janë zhvilluar edhe për investime amerikane në infrastrukturë, energjetikë dhe qendra të të dhënave, ndërsa si një projekt tjetër përmendi minierën e antimoniut në Kriva Pallankë.
Mickoski tha se Qeveria synon të krijojë një kanal të drejtpërdrejtë komunikimi me Korporatën Amerikane të Financave për Zhvillim (DFC) për të siguruar financim për projektet energjetike.
Ai veçoi edhe rëndësinë e gazsjellësit që do të lidhte Maqedoninë e Veriut me terminalin LNG në Aleksandrupoli dhe më pas me Evropën Qendrore. Sipas Mickoskit, projekti do të mundësonte rritjen e ndjeshme të kapacitetit të gazit dhe do ta forconte rolin e vendit si korridor tranziti.
Kryeministri përmendi gjithashtu Korridorin 8, Korridorin 10-D, modernizimin e hekurudhave dhe ndërtimin e linjave të reja të transmetimit të energjisë elektrike si pjesë të projekteve që, sipas tij, kanë rëndësi strategjike.
Mickoski tha se përfundimi i disa prej këtyre projekteve, përfshirë lidhjen veriore të gazsjellësit me Serbinë, pritet deri në fund të vitit 2028.
Sipas tij, këto investime synojnë të forcojnë sigurinë energjetike, pozitën gjeostrategjike dhe zhvillimin ekonomik të Maqedonisë së Veriut.
