Vizita e Kryetarit të Komunës së Strugës, Mendi Qyra, në Bursa mori një dimension të veçantë, jo vetëm institucional dhe ekonomik, por edhe njerëzor e vëllazëror.
Në kuadër të vizitës zyrtare, Qyra dhe delegacioni i Komunës së Strugës u pritën nga Shahin Biba, Kryetar në detyrë i Komunës Metropolitane të Bursës, në një takim ku në qendër të bisedimeve ishte krijimi i një partneriteti më të thellë mes dy qyteteve.
Bursa, qytet me shpirt ballkanik
Një nga momentet më domethënëse të takimit ishte mesazhi i Shahin Bibës për lidhjen e fortë të Bursës me Ballkanin.
Biba nënvizoi se Bursa është një qytet me identitet të fuqishëm ballkanik, duke theksuar se më shumë se një milion banorë të saj vijnë nga trevat e Ballkanit.
Kjo lidhje, sipas tij, nuk është vetëm historike e kulturore, por edhe një bazë e rëndësishme për ndërtimin e marrëdhënieve të reja.
Vetë Biba është me origjinë nga Prizreni i Kosovës dhe, siç tregoi gjatë takimit, prej vitit 2001 jeton në Turqi. Duke folur për afërsinë mes njerëzve të Ballkanit, ai theksoi se “ne jetojmë me hallet e njëri-tjetrit”, duke e konsideruar këtë lidhje njerëzore si një pikënisje të fortë për afrimin mes Bursës dhe Strugës.
Takimi mori kështu një atmosferë dukshëm më të ngrohtë se një takim i zakonshëm protokollar. Biba shmangu formalitetet e tepërta dhe komunikoi edhe në gjuhën shqipe me Kryetarin Qyra, duke i dhënë takimit një karakter të veçantë miqësor dhe vëllazëror.
Nga miqësia drejt bashkëpunimit konkret
Në këtë frymë, Shahin Biba shprehu interesin që në të ardhmen të thellohet bashkëpunimi me Strugën, veçanërisht në fushën ekonomike, kulturore dhe të trashëgimisë.
Bursa, si një nga qendrat më të mëdha urbane dhe ekonomike të Turqisë, paraqet potencial të rëndësishëm për krijimin e lidhjeve të reja institucionale, turistike dhe ekonomike.
Nga ana e tij, Kryetari i Strugës, Mendi Qyra, falënderoi për pritjen e ngrohtë, duke theksuar se Struga është e prirur të bashkëpunojë veçanërisht me komunat turke dhe, në këtë kuadër, Bursa zë një vend të rëndësishëm për shkak të potencialit të saj ekonomik, kulturor dhe turistik.
Qyra vuri në pah potencialet turistike të Strugës dhe mundësinë që ato të prezantohen më fuqishëm para qytetarëve dhe komunitetit të biznesit të Bursës, duke krijuar hapësira konkrete për investime dhe projekte të përbashkëta.
Struga hap dyer të reja në Bursa
Në bisedime u veçua edhe pozita e Strugës, afërsia me Aeroportin Ndërkombëtar të Ohrit dhe regjimi pa viza ndërmjet Maqedonisë së Veriut dhe Turqisë, faktorë që krijojnë mundësi për intensifikimin e lëvizjes së qytetarëve, turistëve dhe bizneseve.
Nga Bursa në Strugë, kështu, po ndërtohet një urë që synon të shkojë përtej vizitave zyrtare.
Një qytet me rrënjë të fuqishme ballkanike dhe një qytet me potencial të madh turistik po kërkojnë pika të përbashkëta në ekonomi, kulturë, trashëgimi dhe turizëm.
Takimi Qyra–Biba, i zhvilluar në një atmosferë të ngrohtë dhe me komunikim të drejtpërdrejtë, përfaqëson një hap të ri në përpjekjet e Strugës për të krijuar lidhje me qendra të mëdha ekonomike dhe urbane të Turqisë.
