Qeveria iraniane ka njoftuar rritjen e çmimit të benzinës në tregun e lirë, në një kohë kur vendi po përballet me një krizë të rëndë ekonomike.
Nga e marta, çmimi i një litri benzinë do të dyfishohet nga 50 mijë në 100 mijë rialë. Ndërkohë, benzina e subvencionuar nga shteti do të mbetet me të njëjtin çmim. Përmes kartës së subvencionimit, qytetarët mund të blejnë 110 litrat e parë me pak më shumë se 1 cent amerikan për litër.
Autoritetet iraniane kanë paralajmëruar për vështirësi në furnizimin me karburant, ndërsa në fund të gushtit u krijuan radhë të gjata në pikat e karburantit, veçanërisht në Teheran.
Rritja e çmimit pritet të ndikojë në kostot e transportit dhe energjisë, si dhe të shtojë presionet inflacioniste, në një vend ku të ardhurat e qytetarëve janë relativisht të ulëta.
Qeveria iraniane ia ka atribuar një pjesë të vështirësive ekonomike pasojave të luftës dhe dëmtimit të infrastrukturës energjetike. Presidenti Massoud Pezeshkian u ka bërë thirrje qytetarëve dhe institucioneve të kursejnë përballë situatës së vështirë.
Rritja e çmimit të karburantit rikthen edhe kujtimet e vitit 2019, kur një vendim i ngjashëm shkaktoi protesta të mëdha në mbarë Iranin. Demonstratat u shtypën nga autoritetet dhe pati qindra viktima, ngjarje që më vonë u njohën si “Nëntori i Përgjakshëm”.
