Në Shkup janë evidentuar tri pika kritike që përmbyten gjatë reshjeve të mëdha – një pjesë e bulevardit „Serbia“, zona pranë „Mavrovka“ dhe rrethrrotullimi te „East Gate“.
Nga Qyteti i Shkupit thonë se për bulevardin „Serbia“ dhe „Mavrovka“ tashmë janë përgatitur zgjidhje teknike, përfshirë pusetat shtesë dhe përmirësimin e rrjetit të kanalizimit atmosferik.
Situata te „East Gate“ është më komplekse. Sipas autoriteteve lokale, për shkak të konfigurimit të terrenit dhe kapacitetit të kufizuar të kanalizimit, problemi nuk mund të zgjidhet vetëm me ndërhyrje të vogla.
Për këtë zonë nevojitet një ndërhyrje më e gjerë infrastrukturore dhe rikonstruksion i një pjese të rrjetit të kanalizimit. Ndërkohë, Qyteti i Shkupit thotë se do të vazhdojë me pastrimin dhe mirëmbajtjen e pusetave dhe rrjetit.
Përmbytje në disa zona të kryeqytetit u regjistruan edhe gjatë reshjeve të 1 korrikut, kur pati rrugë të bllokuara dhe dëme materiale.
