Rreth 46 milionë denarë, ose afërsisht 750 mijë euro, janë paguar vitin e kaluar për dëmshpërblime ndaj qytetarëve të kafshuar nga qentë endacakë në Shkup.
Problemi vazhdon të jetë i pranishëm edhe këtë vit. Deri më 24 qershor, NP “Laika” ka pranuar 710 denoncime nga qytetarët për kapjen e qenve endacakë. Stacionari i ndërmarrjes, i cili ka kapacitet për 140 qen, aktualisht strehon rreth 180 qen.
Sipas procedurës, qentë e kapur dërgohen për trajtim veterinar, ku sterilizohen, vaksinohen kundër tërbimit, mikroçipohen dhe shënohen me etiketë në vesh. Pas vlerësimit të gjendjes së tyre, zakonisht rikthehen në lokacionin ku janë kapur.
Përjashtim bëjnë rastet kur qeni është përfshirë në një incident kafshimi të dokumentuar me raport mjekësor.
Nga “Laika” theksojnë se një pjesë e problemit lidhet edhe me braktisjen e qenve dhe pronësinë e papërgjegjshme. Sipas monitorimit të vitit 2023, në territorin e Shkupit kishte rreth 4.000 qen endacakë, ndërsa rreth 48 për qind e tyre ishin të sterilizuar.
Në disa lagje, qytetarët vazhdojnë të raportojnë grupe qensh që qëndrojnë për një kohë të gjatë në të njëjtat zona. Ankesa të tilla janë bërë edhe nga banorë të Taftalixhes dhe Gjorçe Petrovit, të cilët thonë se ndihen të pasigurt gjatë lëvizjes në lagjet e tyre.
Gjatë vitit të kaluar, “Laika” ka kapur rreth 1.000 qen, prej të cilëve 850 janë sterilizuar.
Në fillim të këtij viti ishte paralajmëruar se Qyteti i Shkupit do të investojë 30 milionë denarë për zgjerimin e kapaciteteve të “Laikës”, me synim trajtimin më sistematik të problemit.
Megjithatë, deri në zbatimin e masave të reja, qytetarët vazhdojnë të përballen me praninë e qenve endacakë, ndërsa shpenzimet për dëmshpërblime mbeten një barrë e konsiderueshme për buxhetin e qytetit.
