Afati gjashtëmujor për përfundimin e hetimit ndaj ish-zëvendëskryeministrit Artan Grubi përfundon më 22 gusht. Nëse deri në atë datë Prokuroria nuk ngre aktakuzë, masa e arrestit shtëpiak ndaj tij do të pushojë së vlefshmi, sipas afateve ligjore.
Sipas informacioneve të publikuara nga Sakamdakazham.mk, prokurori kompetent ka edhe 17 ditë kohë për ta përmbyllur hetimin. Në rast se nuk paraqitet aktakuzë, Gjykata Themelore Penale në Shkup do të vendosë një masë tjetër për sigurimin e pranisë së të dyshuarit, e cila zakonisht është konfiskimi i dokumentit të udhëtimit.
Artan Grubi u dorëzua në pikën kufitare Bllacë më 23 shkurt 2026, pas rreth 14 muajsh jashtë vendit. Ai dyshohet në rastin që lidhet me Lotarinë Shtetërore, ku hetimet kanë të bëjnë me një dëm të dyshuar financiar prej 8,2 milionë eurosh.
Në këtë rast i dyshuar është edhe ish-drejtori i Lotarisë Shtetërore, Përparim Bajrami, i cili vazhdon të jetë i pakapshëm për organet e drejtësisë.
Në hetim janë përfshirë edhe katër persona të tjerë, të dyshuar për keqpërdorim të detyrës zyrtare në procedurat që lidhen me organizimin e lojërave elektronike dhe online të fatit.
Nga Prokuroria Publike nuk kanë bërë të ditur nëse do të ngrihet aktakuzë para skadimit të afatit ligjor, duke theksuar se për momentin nuk ka informacione të reja për këtë rast.
