Të dhënat më të fundit të Eurostatit për pagat minimale bruto në Evropë tregojnë dallime të mëdha mes vendeve, ndërsa Maqedonia e Veriut renditet ndër shtetet me nivelin më të ulët të pagës minimale në krahasim me vendet evropiane.
Sipas raportit për gjysmën e dytë të vitit 2026, vetëm tetë nga 29 vendet e përfshira në analizë kanë rritur pagën minimale bruto gjatë periudhës janar–korrik. Në të njëjtën kohë, inflacioni në eurozonë ka arritur në 3.2%, duke ndikuar në fuqinë reale blerëse të punëtorëve në disa vende.
Luksemburgu vazhdon të ketë pagën minimale më të lartë mujore bruto në Evropë, me 2.771 euro, ndërsa brenda Bashkimit Evropian niveli më i ulët regjistrohet në Bullgari, me 620 euro në muaj.
Sipas të dhënave, pesë vendet me pagat minimale më të larta janë:
- Luksemburgu – 2.771 euro
- Irlanda – 2.391 euro
- Gjermania – 2.343 euro
- Holanda – 2.338 euro
- Belgjika – 2.234 euro
Në grupin e vendeve me paga minimale nga 1.000 deri në 2.000 euro përfshihen, ndër të tjera, Sllovenia, Spanja, Lituania, Polonia, Qiproja, Greqia, Portugalia dhe Kroacia.
Sa i përket Ballkanit Perëndimor, Mali i Zi ka pagën minimale bruto më të lartë me 670 euro, i ndjekur nga Serbia me 620 euro, Bosnja dhe Hercegovina me 517 euro, Shqipëria me 408 euro dhe Maqedonia e Veriut me 405 euro. Kosova nuk është përfshirë në këtë krahasim të Eurostatit.
Të dhënat tregojnë se vendet e Ballkanit Perëndimor vazhdojnë të kenë nivele më të ulëta të pagave minimale krahasuar me shumicën e vendeve të Bashkimit Evropian, si pasojë e dallimeve ekonomike dhe nivelit të zhvillimit.
