Pacientët onkologjikë kanë paralajmëruar një protestë simbolike para Ministrisë së Shëndetësisë, duke kërkuar zgjidhje për mungesën e vazhdueshme të terapisë në Klinikën e Onkologjisë.
Për shkak të temperaturave të larta, në protestë pritet të marrin pjesë vetëm një numër i kufizuar pacientësh, me qëllim që të përcillet mesazhi se mungesa e barnave onkologjike mbetet një problem serioz për personat që marrin trajtim.
Ana Marjanoviq nga shoqata “Hema-Onko” deklaroi se pacientët ndihen të pasigurt dhe të shqetësuar kur paraqiten në klinikë dhe nuk arrijnë ta marrin terapinë në kohën e paraparë.
Sipas saj, që nga muaji maj janë regjistruar disa raste të mungesës së barnave në Klinikën e Onkologjisë, duke përfshirë jo vetëm terapitë biologjike, por edhe citostatikët dhe barna të tjera nga lista pozitive.
Ndërkohë, drejtori i Klinikës së Onkologjisë, Igor Stojkovski, tha se shumica e preparateve tashmë kanë arritur dhe se gjatë kësaj jave pritet të sigurohen edhe barnat e mbetura.
Ai sqaroi se vonesat kanë ardhur si pasojë e rritjes së konsumit, numrit më të madh të pacientëve, periudhës ndërmjet furnizimeve publike dhe problemeve të përkohshme te distributorët.
Pacientët onkologjikë prej kohësh kanë ngritur shqetësime për mungesën e rregullt të terapisë, kushtet në Klinikën e Onkologjisë, numrin e madh të pacientëve dhe problemet me proceset e skriningut.
