Me sezonin veror në kulm, në rrjetet sociale kanë vazhduar debatet lidhur me çmimet në Ohër, ku shpesh publikohen fotografi të faturave për kafe, ujë, parking dhe shezlongë.
Sipas raportimit të TV24, një pjesë e qytetarëve i konsiderojnë çmimet të larta, ndërsa të tjerë vlerësojnë se ato janë të krahasueshme me destinacionet e tjera turistike në rajon.
Njohës të sektorit të turizmit theksojnë se, përveç çmimeve, një rol të rëndësishëm në përvojën e vizitorëve luajnë cilësia e shërbimit, mikpritja dhe profesionalizmi i stafit.
Sipas tyre, një ofertë cilësore dhe shërbim i mirë ndikojnë në rikthimin e turistëve dhe në ruajtjen e reputacionit të Ohrit si një nga destinacionet më të rëndësishme turistike në vend.
Ata vlerësojnë se përmirësimi i vazhdueshëm i standardeve në hoteleri dhe gastronomi mbetet një nga faktorët kyç për zhvillimin e turizmit dhe rritjen e kënaqësisë së vizitorëve.
