Strugë, 25 korrik Zhurnal.mk – Në mes të sezonit turistik, hotelet përgjatë Liqenit të Ohrit po përballen me kapacitete gjysmë të mbushura. Sezoni kalon vetëm me aranzhime të minutës së fundit dhe qëndrime të shkurtra, ankohen hotelierët. Ata thonë se nuk mbajnë mend norma kaq të ulëta që pas pandemisë.
“Ky nuk është justifikim, sepse jetojmë nga këto dy, tre, pesë muaj gjatë gjithë vitit. Ndoshta vetë fakti që mysafirët nuk janë të sigurt, nësea dhe si do të zhvillohet situata nuk rezervojnë paraprakisht, gjë që nuk ka ndodhur prej vitesh, sepse zakonisht të huajt e dinë një vit më parë se ku dhe kur do t’i kalojnë pushimet. Këtë vit, për fat të keq, kemi një trend të minutës së fundit. Ndodh që kemi ditë shumë të dobëta dhe pastaj dy, tre ditë para mbërritjes, hoteli është plot. Fatkeqësisht, është një sezon i çuditshëm, shpresojmë për një përmirësim, por do ta shohim”, deklaroi Ana Jançeva-hoteliere nga Struga.
Problem shtesë është se këtë verë numri i mysafirëve holandezë, të cilët me vite kanë pushuar në Strugë dhe Ohër në mënyrë të organizuar nga maji deri në tetor, është ulur me 70%. Numri i turistëve nga Polonia, të cilët ishin gjithashtu ndër më të shumtët dhe që vinin në Ohër me aeroplanë çarter, është gjithashtu i vogël.
“Pothuajse asnjë, përveç rezervimeve individuale, por ky nuk është një numër që mund të mbushë kapacitetet. Në këtë rast, ne nuk mund të planifikojmë as për më të keqen. Nuk mund të planifikosh me stafin ose njerëzit, dhe ka shumë të ngjarë të ndodhë në periudhën nga 26 korriku deri më 3 gusht, kur do të zhvillohen koncertet në Ohër, që ato 10 ditë të jenë një sezon dhe gjithçka tjetër të jetë Out”, theksoi Ana Jançeva-hoteliere nga Struga.
Edhe pse konsiderohet se një nga arsyet për këtë situatë janë rritja e çmimeve, një pjesë mendojnë se ndikim ka kriza ekonomike dhe tensionet në Lindjen e Mesme
“Nuk mund të themi se Ohri ka çmime të shtrenjta. Çmimet janë rritur dhe janë më të larta, por çfarë prisni ju nga restorantet buzë liqenit ose nga kafenetë që ndodhen në vijën e parë, praktikisht me këmbët në ujë – që një kafe të kushtojë 50 denarë? Kjo nuk është e mundur. Edhe kur shkoni në Itali apo në Çeki, dihet se restorantet në vijën e parë janë gjithmonë më të shtrenjta, ndërsa në vijën e dytë ose të tretë, apo në zona të tjera, mund të gjenden vende më të lira. Çmimet nuk janë shumë të larta; është e vërtetë që janë rritur, por mendoj se kjo është e justifikuar nga ana ekonomike”, tha Jakim Malenko – punonjës në sektorin e turizmit.
Përfaqësuesit e sektorit të turizmit konsiderojnë se shteti duhet të fillojë të kërkojë tregje të reja nga të cilat do të vijnë turistë dhe me të cilat do të garantohet mbushja e kapaciteteve turistike nga maji deri në tetor.
