Komisioni Përgatitor i Kuvendit të Federatës Panshqiptare të Amerikës “Vatra” ka publikuar listën zyrtare të kandidatëve për garën për kryetar të kësaj organizate.
Sipas njoftimit zyrtar, i udhëhequr nga Mondi Rakaj dhe nën mbikëqyrjen e John Ingram, monitor zgjedhor i emëruar nga gjykata, procesi është zhvilluar në përputhje me Kanunoren e “Vatrës” të vitit 1926 dhe udhëzimet e mëvonshme gjyqësore.
Pas shqyrtimit të dokumentacionit dhe përmbushjes së kritereve, janë konfirmuar si kandidatë zyrtarë për kryetar të “Vatrës”:
* Adriatik Spahiu
* Dritan Haxhia
* Dr. Elmi Berisha
* Dr. Pashko Camaj
Ndërkohë, aplikanti Valentino Lumaj është skualifikuar nga gara, pasi nuk ka plotësuar kriteret e përcaktuara sipas urdhrit të gjykatës dhe rregullave të Kanunores së vitit 1926 të Federatës.
Komisioni thekson se vendimi është marrë pas verifikimit të plotë të dosjeve dhe në përputhje me standardet statutore të organizatës.
Procesi zgjedhor në “Vatra” pritet të vijojë me fazat e mëtejshme deri në zgjedhjen e kryetarit të ri të federatës.(INA)
