Volodymyr Zelensky ka publikuar një letër të hapur në të cilën ka propozuar bisedime direkte со Vladimir Putinin për t’i dhënë fund luftës në Ukrainë. Ai tha se do të ishte gabim të pritej që lufta të kthehej përsëri në fokusin e SHBA-së, duke shtuar se paqja mund të arrihet vetëm përmes një angazhimi të drejtpërdrejtë mes Rusisë dhe Ukrainës.
Ai bëri thirrje për një armëpushim të plotë gjatë negociatave të propozuara, diçka që Putini e hodhi poshtë dje. Donald Trump tha se do të ishte shkëlqyeshëm nëse dy liderët do të takoheshin.
Kremlini konfirmoi se e ka pranuar letrën dhe se Putini do të njoftohet për të.
”Pas 26 vitesh në pushtet, mosha po fillon të bëjë të veten te Putini. Ukraina propozon që t’i jepet fund kësaj lufte përmes një angazhimi direkt mes nesh dhe jush. Unë propozoj një takim,” thotë Zelensky.
Kremlini iu përgjigj se ai është i mirëpritur të takohet me Putinin në Moskë. Duke folur me gazetarët perëndimorë në margjinat e Forumit Ekonomik në Shën Petersburg, Putin tha se është i gatshëm dhe dëshiron të arrijë një marrëveshje me Ukrainën, por duhet të bëhen kompromise.
”Trump është i zënë me Iranin, kështu që Bashkimi Evropian mund të bisedojë me Zelenskyn për dorëzimin e territorit,” tha Putin, i cili në fillim të luftës i shpalli rajonet ukrainase të Donetskut, Luhanskut, Khersonit dhe Zaporizhias si ruse.
Negociatat për armëpushim kanë mbetur në rrugëpa krye muajt e fundit, ndërsa bisedimet e zhvilluara në Gjenevë, Abu Dabi dhe Stamboll nuk ishin produktive.
”Ne në Ukrainë nuk jemi të shqetësuar për fatin e ushtarëve rusë pas gjithçkaje që lufta juaj solli në vendin tonë. Por unë shqetësohem për ukrainasit. Po humbim njerëzit tanë dhe çdo humbje është e dhimbshme për ne. Rusët janë lodhur nga sulmet ukrainase me dronë dhe raketa, nga mungesa e benzinës dhe rritja e çmimeve, si dhe nga lufta,” thotë Zelensky në letër.
Ai propozoi që bisedimet të mbahen në vende si Zvicra dhe Turqia.
Gjatë konferencës së tij për shtyp dje, Putin hodhi dyshime nëse një takim apo marrëveshje e tillë do të mund të ndodhte ndonjëherë.
”Nëse Zelensky është një përfaqësues legjitim i Ukrainës, kjo është një pyetje për avokatët, për një analizë juridike,” tha ai, duke aluduar në faktin se presidentit ukrainas i ka skaduar mandati që nga mai i vitit 2024.
