Aktori i njohur Arnold Schwarzenegger ka bërë homazhe për ikonën e filmave aksion, Chuck Norris, pas ndarjes së tij nga jeta në moshën 86-vjeçare.
Lajmi i trishtë u bë publik të premten, më 20 mars, përmes një njoftimi nga familja e aktorit, e cila konfirmoi se Norris kishte ndërruar jetë mëngjesin e së enjtes, më 19 mars, një ditë pasi ishte dërguar me urgjencë në spital në Hawaii.
Pas publikimit të lajmit, figura të shumta nga arti, muzika dhe politika shprehën ngushëllimet e tyre. Ndër to ishte edhe Schwarzenegger, i cili përmes një postimi në X kujtoi marrëdhënien me bashkë-yllin e tij në filmin The Expendables 2.
“Chuck ishte një idhull. Jam mirënjohës që kam pasur mundësinë të punoj me të në shumë mënyra gjatë viteve, nga promovimi i sporteve deri te prania jonë e përbashkët në ekranin e madh. Ai ishte një djalë i mrekullueshëm, si në jetën reale ashtu edhe në Hollywood. Legjenda e tij do të jetojë përgjithmonë. Mendimet e mia janë me familjen e tij”, shkroi ai.
Familja e Norris ka kërkuar respektimin e privatësisë në këto momente të vështira, duke theksuar se aktori ishte thellësisht mirënjohës për dashurinë dhe mbështetjen që kishte marrë ndër vite, veçanërisht gjatë qëndrimit të fundit në spital.
Chuck Norris do të kujtohet si një nga figurat më të mëdha të filmave aksion dhe një ikonë e kulturës popullore, me një trashëgimi që do të jetojë përtej brezave./KultPlus.com
