Më 22 shkurt 1974, në Tidworth të Anglisë, lindi James Blunt, kantautor, producent muzikor dhe ish-oficer i ushtrisë britanike.
Para se të niste karrierën muzikore, Blunt shërbeu si oficer zbulimi në Ushtrinë Britanike dhe ishte oficeri i parë që hyri në Prishtinë, Kosovë, në qershor të vitit 1999. Ai komandoi një njësi gjatë misionit paqeruajtës të NATO-s dhe u bë i njohur për refuzimin e një urdhri të drejtpërdrejtë nga gjenerali amerikan Wesley Clark, për të përballur forcat ruse në aeroportin e Prishtinës, me qëllim shmangien e një përshkallëzimi që mund të çonte në një konflikt më të gjerë.
Blunt u bë i famshëm në vitin 2004 me publikimin e albumit të tij debutues Back to Bedlam, i cili arriti sukses ndërkombëtar. Këngët “You’re Beautiful” dhe Goodbye My Lover u kthyen në hite globale, ndërsa albumi shiti miliona kopje në mbarë botën, duke kryesuar listat në Mbretërinë e Bashkuar dhe duke arritur vendin e dytë në SHBA.
Dokumentari “James Blunt: Return to Kosovo”
Në vitin 2007 u publikua dokumentari James Blunt: Return to Kosovo, i regjistruar në shtator 2006, kur Blunt u rikthye në Kosovë për të mbajtur një koncert për trupat e NATO-s dhe për të vizituar vendet dhe njerëzit që kishte njohur gjatë shërbimit të tij në vitin 1999. Dokumentari u drejtua nga regjisori Steven Cantor.
Filmi ndërthur pamje të realizuara në vitin 2006 me video personale të xhiruara nga vetë Blunt në vitin 1999, si dhe me kronika mediatike nga konflikti në Kosovë.
Gjatë rikthimit, Blunt u ribashkua me tre përkthyesit me të cilët kishte punuar kur njësia e tij u dërgua për herë të parë në Kosovë. Ata synuan të takonin familje me të cilat kishin bashkëpunuar gjatë luftës, por në vend të kësaj gjetën shtëpi të braktisura dhe të shkatërruara.
Grupi vizitoi gjithashtu një varr masiv që skuadroni i Blunt kishte ndihmuar ta identifikonte në vitin 1999. Ai vend ishte kthyer në një varrezë tradicionale, ku shumica e viktimave ishin identifikuar dhe ishin vendosur gurë varresh me portretet e tyre.
Në dokumentar përfshihet interpretimi i këngëve nga albumi Back to Bedlam, përfshirë “You’re Beautiful”, si dhe “No Bravery”, një këngë për konfliktin në Kosovë, të cilën Blunt e shkroi gjatë kohës së shërbimit të tij ushtarak./KultPlus.com
