Shkup, 9 shkurt –Një delegacion qeveritar i përbërë nga zëvendëskryeministri dhe ministër i Transportit Aleksandar Nikolloski, shefi i diplomacisë Timço Mucunski, ministri i Kulturës dhe Turizmit Zoran Ljutkov, ministri i Mjedisit Jetësor dhe Planifikimit Hapësinor Muhamet Hoxha, kryetari i Komunës së Ohrit, Kiril Pecakov dhe kryetari i Komunës së Strugës, Mendi Qyra, sot dhe nesër do të qëndrojë për një vizitë pune dyditore në Paris.
Në kuadër të vizitës, delegacioni do të takohet me Kaled El-Enani, drejtor i përgjithshëm i UNESKO-s, si dhe me përfaqësues të tjerë të lartë të UNESKO-s, njoftoi pres shërbimi qeveritar.
Në takim do të potencohen angazhimet e forta të Qeverisë për ruajtjen e statusit të trashëgimisë natyrore dhe kulturore të rajonit të Ohrit. Gjithashtu do të theksohet se shteti po krijon një sistem mbrojtjeje që garanton ruajtjen e integritetit dhe autenticitetit të rajonit të Ohrit si një vlerë e jashtëzakonshme universale.
Delegacioni do të përqendrohet edhe në masat që Qeveria i ndërmerr, si dhe në faktin që institucionet kompetente po bëjnë përpjekje maksimale për të zbatuar rekomandimet e misioneve reaktive (2020 dhe 2024) dhe Planin Strategjik për Rehabilitim.
Në kuadër të vizitës, sot është planifikuar një takim me Ernesto Otone, ndihmësdrejtor i përgjithshëm i UNESKO-s përgjegjës për kulturë, pastaj me Kongker Mohamad Talha, kryetar i sesionit të 43-të të Konferencës së Përgjithshme të UNESKO-s, ndërsa nesër delegacioni do të takohet me Naser bin Hamad Al Hinzab, kryetar i Këshillit Ekzekutiv të UNESKO-s.
