NASA ka njoftuar shtyrjen e datës së parë të mundshme të lëshimit për misionin Artemis 2, i cili synon të dërgojë astronautë rreth Hënës për herë të parë pas më shumë se pesë dekadash.
Vendimi është marrë për shkak të kushteve të pafavorshme atmosferike, të cilat kanë penguar realizimin e provës përfundimtare të raketës Space Launch System (SLS). Sipas njoftimit zyrtar, dritarja e parë e mundshme e nisjes është zhvendosur nga 6 në 8 shkurt.
Data e re përkon me zhvillimin e Super Bowl-it, një nga ngjarjet sportive më të ndjekura në Shtetet e Bashkuara, por NASA thekson se ende nuk është e sigurt nëse lëshimi do të realizohet pikërisht atë ditë.
Testi final ende i papërfunduar
Prova teknike e fundit e raketës, e cilësuar si test vendimtar para nisjes së misionit, nuk është përfunduar ende. Temperaturat shumë të ulëta që kanë përfshirë një pjesë të madhe të territorit amerikan kanë detyruar shtyrjen e këtij testi për javën e ardhshme.
NASA ka bërë të ditur se vetëm pas përfundimit të testit dhe analizimit të rezultateve do të përcaktohet data përfundimtare e nisjes së misionit Artemis 2.
Mision historik me ekuipazh ndërkombëtar
Artemis 2 do të përfshijë katër astronautë – tre amerikanë dhe një kanadez – dhe konsiderohet një hap kyç në rikthimin e njerëzimit në eksplorimin e Hënës. Ky do të jetë misioni i parë me ekuipazh që do të udhëtojë rreth satelitit natyror të Tokës që nga programi Apollo në vitet ’70.
Agjencia hapësinore ka parashikuar gjithsej 14 dritare të mundshme nisjeje për periudhën nga 8 shkurti deri më 30 prill.
Mund të shtyhet edhe një mision tjetër
Në të njëjtën periudhë, NASA ka planifikuar edhe misionin Crew-12 drejt Stacionit Ndërkombëtar Hapësinor, i cili aktualisht është paraparë për 11 shkurt. Zyrtarët kanë paralajmëruar se ky mision mund të shtyhet nëse Artemis 2 realizohet para kësaj date.
NASA thekson se prioriteti kryesor mbetet siguria e astronautëve dhe përgatitja teknike e plotë e çdo misioni, duke e konsideruar Artemis 2 një nga projektet më të rëndësishme të eksplorimit hapësinor në dekadat e fundit./KultPlus.com
