Shkencëtarët e Buletinit të Shkencëtarëve Atomikë e kanë vendosur Orën e Kiametit në 85 sekonda para mesnatës, pika më e afërt ndonjëherë me shkatërrimin global. Mesnata simbolizon momentin kur Toka bëhet e pabanueshme për njerëzimin.
Krahasuar me vitin e kaluar, kur ora ishte në 89 sekonda para mesnatës, kjo lëvizje tregon përkeqësim të situatës globale. Vendimi bazohet në vlerësimin e rreziqeve ekzistenciale si armët bërthamore, ndryshimet klimatike, kërcënimet biologjike, teknologjitë disruptive dhe inteligjenca artificiale, si dhe përhapja e dezinformatave.
Presidentja e Buletinit, Alexandra Bell, theksoi se “njerëzimi nuk ka bërë përparim të mjaftueshëm dhe çdo sekondë ka rëndësi”. Ndërkohë, ekspertët paralajmërojnë se konfliktet ndërkombëtare dhe mungesa e rregullave për armët bërthamore dhe teknologjitë e reja e rrisin ndjeshëm rrezikun.
Ora e Kiametit u krijua në vitin 1947 si simbol paralajmërues dhe çdo vit rregullohet nga një bord ekspertësh, përfshirë edhe fitues të Çmimit Nobel.
Ora e Kiametit 2026: Shkencëtarët përcaktojnë një kohë të re
