Pensioni minimal është rritur, por pragu shtetëror për trajtim falas spitalor mbeti i njëjtë. Nga partia e pensionistëve kërkojnë që kufiri për trajtimin të rritet nga 18,000 denarë sa është aktualisht, në 25,000 denarë. Kjo sepse rritja e pensioneve në mbi 18 000 denarë, përjashton trajtimin spitalor falas. Partia e pensionistëve paralajmëron se më të varfrit janë më të prekur, sidomos në kushtet e çmimeve më të larta të barnave në rajon, dhe kërkon rritje urgjente të kufirit për trajtim falas.
„Që nga marsi 2025, me rritjen e pensioneve për 2,500 denarë, pensioni minimal arriti në 18,292 denarë, ndërsa kufiri për trajtim falas spitalor mbetet 18,000 denarë. Me këtë fakt, për një periudhë të gjatë asnjë pensionist në vend nuk është i përjashtuar nga pagesa për trajtimin spitalor, gjë që prek më së shumti pensionistët me pensione më të ulëta dhe familjet e tyre. Duhet theksuar se ky problem është edhe më i ndërlikuar, pasi në të njëjtën kohë kemi çmimet më të larta të barnave në rajon“, thonë nga Partia e pensionistëve.
Pensionistët thonë se duhet të rikthehet sistemi i mëparshëm, kur të gjitha trajtimet ishin falas.
Anketë me pensionistë
„Të jetë falas, kemi pensione shumë të vogla.“
„Të jetë falas do të ishte shumë mirë, si në gjithë botën. Duhet të mos paguajmë.“
Nga Qeveria për televizionin Alsat thonë se janë të informuar për kërkesën e pensionistëve dhe po e shqyrtojnë atë.
„Kjo është një kërkesë për të cilën si Qeveri jemi të informuar, dhe është përcjellë në takimet e rregullta që kanë institucionet përgjegjëse, Ministria e Politikës Sociale, Demografisë dhe Rinisë dhe Fondi për Sigurim Shëndetësor, me Lidhjen e Pensionistëve. Si Qeveri, me përgjegjësi dhe vëmendje të veçantë e shqyrtojmë kërkesën e tyre, si dhe të gjitha ligjet dhe aktet nënligjore që duhet të ndryshohen. Për këtë qëllim, do ta informojmë publikun në kohë“, thonë nga Qeveria.
Pensionistët, përveç trajtimit falas spitalor, kërkojnë edhe uljen e çmimit të ilaçeve të cilat thonë se i paguajnë shumë shtrenjtë.
Anektë me pensionistë
„Meqenëse kemi shumë shpenzime, vetëm për barna paguajmë 3,000 – 4,000 denarë të paktën për një person, e për dy 6,000, pra rreth 100 euro paguajmë. Duhet të ishte si më parë, gjatë kohës së Jugosllavisë, nuk paguanim asgjë, as për barna.“
„Varet se nga çfarë sëmundje vuajnë, disa barna janë më të shtrenjta, disa që mbulohen nga fondi janë më të lira.“
Partia e pensionistëve kërkon që ndryshimet eventuale të bëhen e shumta në janar të vitit 2026./Alsat.mk
