Ndryshime të rëndësishme pritet të ndodhin në arsim përmes Strategjisë 2026–2032. Ministrja e Arsimit, Vesna Janevska tha se strategjia sjell një qasje të re tek arsimi i mesëm profesional, duke ofruar programe dyvjeçare, trevjeçare dhe katërvjeçare, të përshtatura sipas kërkesave të tregut të punës. Janevska, theksoi se ky model u jep nxënësve mundësinë të hyjnë më shpejt në tregun e punës, por edhe të vazhdojnë arsimin e mëtejmë nëse dëshirojnë.
“Profesione të caktuara nuk kërkojnë shumë njohuri teorike. Tregu i punës kërkon aftësi të caktuara që aktualisht mungojnë në Maqedoni dhe ne themi se dikush mund të përfundojë arsimin e mesëm për dy vjet dhe menjëherë të hyjë në tregun e punës. Nëse dëshiron, mund të vazhdojë në vitin e tretë, por nëse nuk dëshiron, mund të dalë në tregun e punës. Mund të përfundojë për tre vjet, gjithashtu do të varet nga studenti nëse do të vazhdojë në vitin e katërt apo do të dalë në tregun e punës. Kjo është një risi që besoj se ishte e nevojshme dhe që do të kontribuojë ndjeshëm në përmirësimin e ekonomisë në vend dhe sigurisht në kënaqësinë e studentëve”, tha Vesna Janevska, ministre e Arsimit.
Duke shpjeguar detajet kryesore të dokumentit, Janevska tha se reformat e parashikuara prekin të gjitha nivelet e arsimit, nga kopshtet deri në universitetet. Sipas saj, transformimi fillon te fëmijët më të vegjël, me kurrikula të reja në arsimin parashkollor dhe me objektivin që shkollat të punojnë me një turn, një model që synon më shumë kohë cilësore për nxënësit, jo vetëm në mësim, por edhe në aktivitete zhvillimore jashtëshkollore.
“Fillojmë me arsimin parashkollor ku do të ketë një ndryshim në kurrikulat për të përgatitur më mirë më të vegjlit për hyrjen në shkollë. Ajo që e konsideroj jashtëzakonisht të rëndësishme është mësimdhënia me një turn që mbetet pjesë e strategjisë, me qëllimin e vetëm për një qëndrim më të gjatë të nxënësve në shkollë, jo vetëm duke punuar në programet mësimore, por edhe përmes aktiviteteve jashtëshkollore që u ndihmojnë të mësojnë për jetën dhe të kuptojnë dijen e fituar”, shtoi Vesna Janevska, ministre e Arsimit.
Ndryshime të rëndësishme janë paralajmëruar edhe në arsimin e lartë duke sjellë më shumë praktikë në studime, investim më të madh në shkencë dhe synimin për të ngritur parkun e parë shkencor teknologjik në vend. Pjesë e rëndësishme e strategjisë është edhe zhvillimi profesional i mësimdhënësve. Janevska theksoi se do të ketë trajnime të shumta, sidomos në fushën e teknologjisë dhe inteligjencës artificiale, në mënyrë që mësuesit të jenë të përgatitur për ndryshimet e shpejta globale. Strategjia për arsim 2026–2032 që tashmë është në ENER do të jetë publike deri në mes të muajit dhjetor ku të gjithë të interesuarit mund të japin vërejtjet dhe sugjerimet e tyre, për të përmirësuar dokumentin para miratimit final./Alsat.mk
